Asnjë barrierë dhe asnjë pengesë. Prej ditës së nesërme shqiptarët rifitojnë krenarinë dhe dinjitetin e tyre evropian. Ministrat e Brendshëm dhe të Drejtësisë të vendeve të Bashkimit Evropian (BE), do thonë fjalën e fundit, në shenjë mirënjohje për progresin reformator të qeverisë Berisha, duke miratuar propozimin e Parlamentit Evropian për liberalizimin e vizave Shqipëri-BE. E gjitha është një moment kulmor dhe ndër më të rëndësishmit në rrugën e vendit drejt integrimit evropian. Heqja e vizave përbën vlerësimin më të lartë të vlerave evropiane të popullit shqiptar si dhe është medalja më e çmuar që Shqipëria arrin të sigurojë në një kohë rekord, vetëm 2 vjet pas përcaktimit të rekomandimeve dhe kritereve të Komisionit Evropian, për udhërrëfyesit për vizat. Kryeqyteti i Shqipërisë, Tirana është zbukuruar në pritje të vendimit për liberalizimin e vizave që do të merret nesër nga ministrat e brendshëm të Bashkimit Evropian. Përgjatë bulevardit “Dëshmorët e Kombit” janë vendosur banderola dhe tabela që njoftojnë ngjarjen e madhe dhe të shumëpritur nga shqiptarët me emrat e kryeqyteteve kryesore të Evropës. Mazhoranca ka vendosur që festimet të zhvillohen të martën në mbrëmje ku në sheshin “Nënë Tereza” po ndërtohet një skenë gjigante ku do të mbahet një koncert, ndërsa do të ketë edhe projeksione të ndryshme në universitetin e Tiranës. Po ashtu edhe zona e ish bllokut është veshur me zbukurime për nderë të liberalizimit të vizave. Festa në këtë pjesë të kryeqytetit është lënë për në orët e mbrëmjes dhe do t`i dedikohet kryesisht të rinjve.