Mazhoranca nuk duket se do ta ndjejë shumë përgjigjen negative që është përgatitur nga Komisioni Evropian në lidhje me kërkesën e Shqipërisë për statusin e vendit kandidat. Kjo sepse në datën 9 nëntor, kur kjo përgjigje pritet të merret, mazhoranca, së bashku me qytetarët, do të jetë duke festuar me rastin e marrjes së të drejtës së shqiptarëve për të lëvizur të lirë në hapësirën “Shengen” të Bashkimit Evropian. Kështu vendimin për liberalizimin e vizave, i cili pritet të merret më 8 nëntor nga ana e ministrave të Brendshëm të Bashkimit Evropian, mazhoranca duket se do ta festojë pasditen e datës 9 nëntor, në një koncert festiv, i cili do të mbahet në sheshin “Nënë Tereza” në kryeqytet. Në këtë koncert, i cili pritet të vijojë edhe pas mesnatës, janë ftuar të gjithë qytetarët shqiptarë, të cilët pritet të jenë të shumtë, nisur nga vendimi i rëndësishëm që po pret Shqipëria të marrë në Bruksel. Vendimi pritet të merret të hënën në mbledhjen e ministrave të BE-së, ndërsa hyn në fuqi përpara në datën 15 dhjetor, kohë kjo në të cilën shqiptarët do të kenë mundësi të lëvizin lirshëm në Evropë, vetëm me pasaportën e tyre biometrike dhe pa pasur nevojën e një vize të marrë në ambasadë.