Flamuri shqiptar u dogj dy herë brenda pak ditësh në stadiumet europiane. Pas ngjarjeve të Gjenovës, në takimin Itali-Serbi, kur një tifoz serb i vuri flakën flamurit me shqiponjën në mes, gjithçka është përsëritur në stadiumin e Zenitit në Shën-Petersburg. Duket se gjithçka është stisur në qarqet sllave, që shquhen për qëndrime antishqiptare. Ngjarja merr përmasa edhe më të rënda për vetë faktin se në fushë, në atë ndeshje, ka qenë Ervin Bulku, futbollist i përfaqësueses kuqezi. Bulku nuk e ka parë që është djegur flamuri ynë. Vetëm në fund të takimit shokët e skuadrës, që kanë kuptuar edhe koret raciste në stadium, i kanë shpjeguar gjithçka ka ndodhur. “Gjatë ndeshjes nuk e kam kuptuar çfarë ka ndodhur. Po ta kisha parë djegien e flamurit apo kuptuar koret raciste, do të kisha braktisur fushën. Sigurisht, në fillim do t’i kërkoja gjyqtarit ta ndalte atë shfaqje të shëmtuar dhe, në rast se do të vazhdonte, do ta braktisja fushën,” – është shprehur Bulku nëpërmjet telefonit nga Kroacia. Vetëm pasi ka mbaruar ndeshja, futbollistët e Hajdukut e kanë “ngacmuar” Bulkun për ngjarjen. “U çudita kur shokët e skuadrës më pyetën në dhomat e zhveshjes për atë që kishte ndodhur. Jo vetëm që ishte djegur flamuri ynë, por tifozët kishin bërë thirrje në kor “Poshtë Kosova, Serbia është zemra jonë”. Madje kjo thirrje ishte shkruar në një banderolë. Të paktën kështu më thanë. Madje ka pasur konfrontime edhe mes tifozërive, pasi te Zeniti, me sa mora vesh, luanin dy lojtarë serbë. U mërzita shumë kur më treguan futbollistët e tjerë, madje u thashë që po ta kuptoja që në fillim, kjo do të ishte në favor të Hajdukut, që ndoshta do të merrte pikët në tavolinë,” - ka shpjeguar më tej Ervin Bulku.