Ndeshja miqësore me Maqedoninë, që do të luhet më 17 nëntor në stadiumin e Korcës, po afron, sikurse ka nisur të mendohet edhe për përgatitjet e drejtuesve të FSHF-së, të kombëtares dhe të klubit të Skënderbeut, si mikpritës I kësaj sfide fqinjësh. Por, nga sa merret vesh, kanë filluar të përgatiten edhe tifozët kuqezinj, që duket se do ta shfrytëzojnë këtë ndeshje si momentin e duhur për t’iu kundërpërgjigjur kolegëve serbë dhe atyre rusë për djegien e flamurit tonë kombëtar (në ndeshjen Itali-Serbi dhe në sfidën Zenit Petersburg-Hajduk I Spilitit). Cka do të thotë se do të veprojnë me të njëjtën monedhë gjatë ndeshjes miqësore me Maqedoninë, për të mos mbetur prapa në këtë drejtim. Një sinjal të tillë e ka edhe vetë Federata Shqiptare e Futbollit, e cila është shprehur e shqetësuar përsa i përket mbarëvajtjes së ndeshjes miqësore mes Shqipërisë dhe Maqedonisë, që do të luhet më 17 nëntor në Korçë. Drejtuesit e FSHF-së janë informuar se disa grupe “ultras” të tifozëve kuqezinj po programojnë që të djegin një flamur serb dhe një flamur rus në këtë ndeshje, si përgjigje ndaj djegies së flamurit shqiptar nga tifozët seb në Xhenova dhe nga tifozët rus në takimin e “Europa League”, Zenit – Hajduk. Vetë sekretari i përgjithshëm i FSHF-së, Eduard Prodani, ka nënvizuar se nuk ka një njofitm zyrtar të tifozëve kuqezinj për një plan të tillë, as informacione nga policia, megjithatë, ai u ka bërë një apel tifozëve kuqezinj për të hequr dorë nga të tilla iniciativa. “Ashtu si në takimet e tjera të kombëtares, bashkëpunimi me policinë do të jetë maksmal, por këtë herë do t’i kërkoj zyrtarisht Policisë së Shtetit që të marrë masa drastike dhe të shtojë vigjilencën gjatë takimit. Nuk jemi njoftuar zyrtarisht për një plan të tillë të tifozëve, por personalisht e shoh si një veprim të gabuar të fansave, nëse ata vërtet kanë ndërmend të djegin flamuj të kujtdo shteti në stadium gjatë ndeshjes. Kjo vetëm sa do të nxinte imazhin e Shqipërisë dhe do t’i hapte akoma më shumë probleme FSHF-së”, - ka pohuar Prodani.