Ultrasi serb, kafsha që dogji flamurin shqiptar në ndeshjen e ndërprerë Itali-Serbi, të vlefshme për kualifikueset e Euro 2012-s, quhet Ivan Bogdanoviç. I mbiquajtur “njeriu i zi”. Gazetat italiane e kanë përshkruar deri në detaje arrestimin e tij në orën 3 të natës midis 12 dhe 13 tetorit. Fotot e Ivanit, si në stadium teksa hipte mbi rrjetën e hekurt që rrethon stadiumin e më pas digjte flamurin shqiptar, por dhe të arrestimit të “njeriut të zi” me tatuazhe bënë xhiron e botës, duke mbjellë urrejtje. Pikërisht tatuazhet ishin dhe “thembra e tij e Akilit”, pikërisht prej tyre ai u zbulua dhe u arrestua, pasi ai Ivani i “tmerrshëm” ishte me kapuç në kokë, kur bëri një nga aktet barbare më të paprecedent në stadiumet italiane, e ndoshta dhe në futbollin botëror.

Agjentët italianë e kërkuan gjatë gjithë natës, pas çrregullimeve që provokuan ultrasit serbë në fushë, ndërkohë që shumica prej tyre hipi në autobusë pas ndeshjes. Sërish pati tension midis ultrasve dhe policisë italiane, që më pas u përforcua edhe me forca speciale, duke i detyruar të gjithë tifozët serbë të hipnin në stadium. Përveç njërit. Ivanit. “Njeriut të zi”. Një 28-vjeçar, simboli i skuadrës “Crevena Zvezda”. Një njëri-bombë. Me fizik të madh. Të frikshëm. Forcat italiane të rendit i zbritën një nga një të gjithë pasagjerët. Më pas, ua zhveshën të gjithëve bluzat, për të njohur tatuazhet e kapura nga telekamerat. Asnjë. Më pas, autobusët u rinisën, larg stadiumit “Marasi”, pas një nate të transformuar në një ankth për tifozët dhe skaudrat. Por, pa Ivanin. Pasi ai ishte fshehur diku.

Kur nga autobusët kishte mbetur vetëm një, ai ishte i rrethuar nga një numër i madh agjentësh. Pikërisht atje ndodhej “njeriu i zi”. “Ishte ora 2.30 e mëngjesit”, – shkruan “Gazzetta dello Sport”. Tifozët serbë ishin kontrolluar të gjithë, por pa sukses, por më përjashtim të njërit. Pikërisht Ivanit. Në orën 2.41 ai u arrestua. Midis duartrokitjeve dhe sharjeve. Ishte arrestuar dhe i rrethuar nga shumë agjentë. Ndërsa në stadium, Ivani rinte kryelartë, aty midis policëve italianë, duarlidhur.

Ivani, ultrasi me tatuazhin bombë

Ivan Bogdanov, ultrasi serb i arrestuar në mëngjesin e së mërkurës në Xhenoa të Italisë, është një nga kapot historikë më të njohur të tifozerisë serbe dhe të “Crvena Zvesdës” së Beogradit. Ivani ka një tatuazh ku është vizatuar një bombë e vendosur në dorë të bërë në pektoralin e djathtë dhe vitin 1389 në bicepsin e djathtë: vitin e betejës së serbëve kundër turqve, që simbolizon edhe shenjën e shpirtit ultranacionalist serb. Sipas asaj që tregon faqja serbe, “B92.net”, Bogdanov është 29 vjeç dhe një i papunë. Dosja e tij penale është e mbushur plot e përplot: grindje, rrahje, agresion në publik, por dhe prodhim e zotërim të substancave narkotike.

Serbia: Ndjesë për ngjarjen në Itali
Serbia i kërkon ndjesë Italisë për incidentet e një ditë më parë gjatë takimit mes dy kombëtareve të futbollit.

Mediat serbe e kanë komentuar si turp dhe cnderim atë që ndodhi në stadium të martën në mbrëmje.

“Këta ekstremistë nuk përfaqësojnë ndjenjat e popullit serb”, tha ambasadorja serbe në Romë, Sanda Raskovic-Ivic. Sipas saj ajo që ndodhi ishte fatkeqësi dhe dicka shumë e shëmtuar.

“Unë dhe të gjithë serbët jemi të turpëruar. Gjej rastin për të kërkuar ndjesë në emër të ambasadës, qeverisë dhe gjithë popullit serb”, tha Raskovic-Ivic.

Mediat

“Turp i ri; tifozët ndërpresin Itali-Serbi” titullohet artikulli kryesor në të përditshmen e Beogradit “Blic”. Në brendësi të tij theksohet se me këtë incident, vijon pikiata e futbollit serb. “Mund të imagjinojmë se si janë ndjerë kapiteni dhe futbollistët tanë. Me siguri, janë turpëruar”.

“Skandal në Xhenova”, titullohet edicioni online i “Vesti”.Ndërsa “Vreme” hapet me një fotografi ku titozët serbë dogjën flamurin shqiptar.

Autoritetet

Shqetesimin e ka ndjerë edhe ministrja serbe e Sportit, Snezana Samardzic-Markovic. “Një grup personash që autoidentifikohen si tifozë të Serbisë kanë cnderuar veten e tyre, dhe gjithë Serbinë. Imazhet e dhunës, të para në të gjithë botën, janë një turp dhe një goditje ndaj procesit të ristrukturimit të reputacionit të sportit serb”, tha ministrja.

Digjet flamuri serb para ambasadës Serbe në Tiranë
Tiranë. Pas djegies së flamurit shqiptar nga disa ultras serbë në Itali gjatë ndeshjes me Italinë, vjen reagimi i tifozëve Kuq e zi që djegin flamurin serb përpara përfaqësisë diplomatike të Serbisë në Tiranë.

Në orët e mbrëmjes së ditës së martë tifozët shqiptarë kanë protestuar para ambasadës serbe në Tiranë ku edhe kanë djegur flamurin serb. Ndërkohë që gjatë kësaj proteste nga tifozët është qëlluar edhe një punonjës i policisë i cili ka tentuar të mos lejojë protestën të zhvillohej para derës së ambasadës.

Madje, për të shpërndarë tifozët, forcat e policisë kanë qëlluar disa here me armë në ajër. Por nuk dihet nëse plumbat ishin të vërtetë apo manovër.