Sekretarja amerikane e Shtetit, Hillary Clinton, arrin sot në Kosovë. Ajo fillimisht do të takojë udhëheqësit më të lartë të institucioneve shtetërore dhe do të vizitojë Manastirin e Graçanicës, 6 km në juglindje të Prishtinës.

Vizita e zonjës Clinton në Kosovë pason takimet që ajo ka zhvilluar në Sarajevë dhe Beograd me udhëheqësit më të lartë shtetërorë të këtyre dy vendeve.

Në Sarajevë, ajo u ka bërë thirrje të gjitha palëve në Bosnjë që t’i përqafojnë reformat politike, të nevojshme për anëtarësimin e vendit në Bashkimin Evropian dhe në NATO.

Ndërkaq, në Beograd, kryediplomatja amerikane ka kërkuar nga presidenti serb, Boris Tadiq, fillimin e bisedimeve me Kosovën.

Autoritetet e rendit në Prishtinë thonë se i kanë marrë të gjitha masat për të siguruar një ambient të qetë dhe të sigurt me rastin e kësaj vizite. Kryeqyteti i Kosovës është mbushur me fotografi të zonjës Clinton dhe është dekoruar me flamuj amerikanë e kosovarë.

Para 17 muajsh, Kosovën e pati vizituar edhe nënpresidenti i Shteteve të Bashkuara, Joe Biden, më 21 maj të vitit 2009.