Ngjarja e rëndë ndodhi të premten rreth orës 18:30 në qytetin e Beratit.

45-vjeçari Kosta Morava kreu krimin në banesën e prindërve të tij në lagjen “30 Vjetori” dhe më pas u vetëdorëzua në polici. Mësohet se viktima është shtetësja me origjinë rumune, Johana Barasku. Sipas burimeve të policisë, nga hetimet paraprake dhe dëshmitë e të afërmve të autorit të krimit, 45-vjeçari bashkëjetonte prej katër vitesh me shtetasen e huaj në Itali. Ata kishin vetëm tetë ditë që ishin kthyer në Berat, por sipas fqinjëve të tyre, gjatë ditëve të fundit kishin dëgjuar zënka ndërmjet çiftit. Burime nga grupi i hetimit bënë të ditur se dyshimet paraprake për motivin e ngjarjes kanë të bëjnë me xhelozinë e beratasit ndaj 22-vjeçares. Ai e akuzonte vajzën rumune për një lidhje tjetër që kishte krijuar në Itali, dyshim i cili ishte bërë shkak i konflikteve të tyre. Sipas policisë, vajza i kishte kërkuar Moravës të largoheshin nga Berati dhe të riktheheshin në Itali. Por kërkesa e vazhdueshme e saj për t’u larguar kishte bërë që 45-vjeçari ta akuzojë atë për lidhje tjetër në shtetin fshqinj. Pas sherrit disaditor në banesën e 45- vjeçarit në Berat, vajza ka tentuar të ikë nga shtëpia, por në këtë moment, Morava e qëlloi disa herë të dashurën e tij në pjesë të ndryshme të trupit. Për pasojë, 22-vjeçarja gjeti vdekjen e menjëhershme. Pasi konstatoi vdekjen e të dashurës, Morava ka sinjalizuar policinë. Mësohet se ai qëndroi në banesë dhe priti blutë derisa ata mbërritën dhe e prangosën me akuzën e vrasjes. Policia e Beratit bëri të ditur se ka nisur hetimet për të zbardhur edhe motivin e ngjarjes së rëndë që tronditi mbrëmë banorët e lagjes “30 Vjetori”. Paraprakisht mësohet se autori e ka pranuar krimin, por për shkak të gjendjes së rëndë psikologjike në të cilën ai ndodhej, nuk ka detajuar momentet e vrasjes, veçse faktin e një sherri për motive xhelozie. Sipas policisë, Morava ishte divorcuar disa vite më parë, ndërsa kishte një fëmijë nga martesa e tij e parë.