Borriello: Na u mohuan 2-3 penallti të qarta. Sensi: Në Itali mund të arbitrojnë edhe të verbrit.
Një ditë pas takimit Brescia - Roma bota e futbollit në Itali është në hije. Drejtuesit dhe lojtarët e klubit kryeqytetas, të skandalizuar nga mënyra se si ka arbitruar këtë ndeshje treshja e gjyqtarëve e udhëhequr nga Russo, nuk kanë qëndruar duarkryq, por kanë akuzuar rëndë Federatën Italiane të Futbollit (FIGC) dhe Ligën Italiane të Futbollit.
Flet Borriello
Qendërsulmuesi i Romës, Borriello, autor i golit të vetëm për të tijtë, nuk i ka përtypur padrejtësitë që i janë bërë ekipit kryeqytetas dhe ka hedhur akuza të rënda kundrejt “qeverisë” së futbollit italian. Sipas Sky, lojtari në fjalë para se të hipte në avionin që do ta kthente në Romë ka thënë: “Na u mohuan dy-tri penallti. Kur isha tek Milani, këto gjëra nuk na ndodhnin kurrë, - konfirmoi bomberi. - Tani po kuptoj diferencën e të bërit pjesë e Romës dhe Milanit. Gjithsesi, mendoj se jemi një ekip i madh dhe si i tillë duhet të reagojmë sa më shpejt”. Më pas, Borriello akuzoi rëndë arbitrin e takimit, duke thënë: “Dhe të mendosh se Russo (kryesori i ndeshjes) kur arbitronte Milanin më kërkonte gjithmonë fanellën, ndërsa tani as më flet me gojë”.
Presidentja Sensi: Arbitrojnë edhe të verbrit
Rosella Sensi, presidentja e Romës, nga ana e saj u bëri thirrje drejtuesve të Federatës së Futbollit Italian që t’i gjejnë një zgjidhje sa më të shpejtë problemit të arbitrave. Pas akuzave që bënë dy ditë më parë drejtuesit e verdhekuqve në mikrofonat e “Roma Channel”, presidentja tregoi se “plaga” është ende e hapur: “Shpresoj që tani Abete (presidenti i Federatës Italiane të Futbollit, FIGC) e Beretta (presidenti i Ligës së Futbollit Italian) të mos mendojnë shumë se si futbollistët duhet të festojnë epifaninë, por të mblidhen dhe të vendosin rregull në fushë. Në katërkëndëshin e blertë në vend të moviolës po drejtojnë edhe të verbrit”.
Abete: Roma është dëmtuar, Beretta: Arbitra, çfarë gabimesh!
Pas akuzave të rënda që iu adresuan institucioneve të futbollit, drejtuesit e këtyre të fundit u detyruan që të mbroheshin. I pari që mori përsipër të dilte para kamerave, ishte presidenti i Federatës Italiane të Futbollit, Giancarlo Abete. “Roma, në një moment të keq, u dëmtua rëndë në Brescia. Mendoj se çdo kritikë që na është bërë, është me vend. Tani për tani duhet të mblidhemi të gjithë e të kërkojmë të përmirësohemi, edhe pse të gjithë ne duhet të mësojmë të bashkëjetojmë me gabimet”. Ndërkohë që edhe presidenti i Ligës Italiane të Futbollit është në të njëjtën gjatësi vale me Abeten: “Mendoj se Rosella Sensi ka bërë mirë që ka futur në këtë mes edhe kreun e Ligës së Serisë A. Ne merremi me AIA-n (Shoqata Italiane e Arbitrave) dhe kërkesa e saj është e drejtë”. Kështu presidenti i Ligës, Maurizio Beretta, mori të gjitha përgjegjësitë.
Nicchi: Russo mund të pezullohet
“Ka shumë mundësi që arbitri Russo të pezullohet për disa kohë”. Kështu, presidenti i AIA-s, Marcello Nicchi, tregoi se ndaj arbitrit që penalizoi Romën, do të merren masa. “Na vjen shumë keq për atë çka ndodhi në Brescia. Përveç episodeve që ndodhën atje, më duhet të them se për arbitrat e tjerë kjo javë qe e suksesshme, -shtoi Niçhi. - Në njëfarë pike i kuptoj protestat e Romës, edhe pse them se gabime mund të gjejmë kudo. Ne si shoqatë nuk na mbetet gjë tjetër, veçse të bëjmë të mundur që arbitrat të bëjnë punën e tyre në një ambient sa më të qetë”.