Ministri i Punëve të Jashtme, z. Edmond Haxhinasto, mori pjesë në darkën transatlantike, dhënë nga Sekretarja e Shtetit e ShBA, znj. Hillary Clinton, në Nju Jork. Në këtë darkë pune, ku ishin të ftuar ministrat e Punëve të Jashtme të vendeve anëtare të NATO-s, u diskutua rreth disa çështjeve të rëndësishme për paqen dhe sigurinë në zonën euroatlantike dhe më gjerë, si dhe mbi sfidat e reja për sigurinë e përbashkët dhe mundësinë e rritjes së bashkëpunimit, me qëllim përballimin e tyre. Gjatë darkës, ministri Haxhinasto zhvilloi edhe një bisedë të ngrohtë me Sekretaren amerikane të Shtetit, znj. Hillary Clinton, e cila e uroi z. Haxhinasto për marrjen e detyrës dhe i konfirmoi ftesën për një vizitë në Uashington në fundin e këtij viti. Gjatë bisedës me Sekretaren Clinton, ministri Haxhinasto diskutoi rreth zhvillimeve në rajon, duke theksuar gatishmërinë e Shqipërisë për të promovuar më tej dialogun dhe bashkëpunim konstruktiv mes vendeve të Ballkanit Perëndimor. Gjithashtu, ministri Haxhinasto theksoi se është i nevojshëm vazhdimi i angazhimit intensiv të Shteteve të Bashkuara në procesin e bisedimeve që qeveria e Kosovës do të vazhdojë me Serbinë për çështje teknike, veçanërisht tashmë që çështja e statusit është mbyllur përfundimisht. Sekretarja Clinton i konfirmoi ministrit Haxhinasto se SHBA do të jetë pjesë aktive e këtij procesi. Darka transatlantike u organizua gjatë sesionit të 65-të të Asamblesë së Përgjithshme të OKB-së që po zhvillohet në Nju Jork.