Gjermania stoliset me medalje të bronztë, ndërsa Uruguai renditet i katërti në botëror. Edhe njëherë gjallesa nënujore Oktapod Pauli doli i saktë, i cili pati parashikuar fitore të Gjermanisë!
Kombëtarja e Gjermanisë zuri vendin e tretë në Kampionatin botëror, pasi mundi me rezultat 3:2 kombëtaren e Uruguait. Ndeshje dramatike, me kthesa në rezultat që mbajti në ankth adhuruesit në stadiumin e futbollit "Port Elizabeth". Gjermania humbjen në 2:1 e ktheu në fitore dhe kësisoj stoliset me medalje të bronztë në botëror. Gjermanët në minutën e 19-të kalojnë në epërsi me golin e shënuar nga Muller. Pas një veprimit të bukur, futbollisti Schëeinsteiger dërgoi gjuajtje të fortë nga rreth 25 metra, mezi mbrojti portieri Muslera, topi i kthyer deri të Muller, i cili nga afërsia nuk e pati të vështirë të shënoi për epërsinë 1:0. Uruguai në vazhdim dëshmoi lojë mjaft të mirë dhe si rrjedhojë e kësaj edhe barazoi rezultatin 1:1. Një veprim i rrjedhëm dhe në mënyrë shkollore nga futbollisti Suarez e gjeti si me dorë Cavanin dinak brenda 16-shit, i cili me mjeshtëri e mposhti portierin gjerman Butt pikërisht në minutën e 28-të.



Në minutën e 51-të, pas harkimit të Arevalos deri te Forlan, i cili si mjeshtër i vërtet qëllon topin nga rreth 13-14 metra, duke shënuar gol të bukur dhe kaloi në epërsi 2:1 Uruguain. Gjermanët nuk dorëzohen, por dëshmojnë lojë të mirë. Pas pesë minutave (56') lojë barazohen shifrat 2:2. Boateng me dinakëri harkoi në 16-sh, ndërsa Jansen shkëputet për bukuri në mesin e mbrojtësve rival dhe me kokë shënon gol. Në minutën e 63-të, Suarez ka rrezikuar seriozisht portën gjermane, por portieri Butt nuk befasohet. Uruguai sërish pati rast të mirë në minutën e 65-të, por Forlan në pozitë të mirë nuk arriti të mposht portierin Butt, i cili reagoi me sukses të lartë. Zëvendësuesi Kissling ka pasur rast të mirë në minutën e 76-të, por gjuajtjen e tij të fuqishme e ka ndalë portieri Muslera. Gjermanët edhe njëherë dëshmuan se janë gjerman dhe nuk dorëzohen deri në fund. Në minutën e 82-të, pas një tollovie në 16-shin e Uruguait, futbollisti Khedira nga afërsia me mençuri shfrytëzoi rastin dhe me kokë dërgoi topin në pjesën e epërme të portës dhe 3:2. Në minutën e 92-të, Forlan nga gjuajtja e lirë rreth 22-23 metra ka qëlluar tërthorsën dhe shpëtuan gjermanët. Gjermania arriti të renditet e treta në botëror, duke e përsëritur suksesin e vitit 2006. Gjermania edhe pa Klosen dëshmoi se është e fortë, i cili mungoi në këtë ballafaqim. Uruguai me një Forlan të fuqishëm me gjithë humbjen ka lënë përshtypje të një kombëtare të fuqishme dhe sigurisht se duhet të jenë të kënaqur me vendin e katërt në botëror. Edhe njëherë gjallesa nënujore Oktapod Pauli doli i saktë, i cili kishte parashikuar fitore të Gjermanisë!





Uruguai-Gjermania 2:3 (1:1)

Stadiumi "Port Elizabeth".
Shikues: 40.000.
Gjyqtar: Bento Archuntia (Meksika).
Shënues: Cavani (28'), Forlan (51') për Uruguain dhe Muller (19'), Jansen (56'), Khedira (82') për Gjermaninë.
KV: Perez (URU), Aago, Cacau (GJ).
Uruguai: Muslera, Fucile, Lugano, Godin, Caceres, Pereira, Perez (Gargano), Arevalo, Cavani (Abreu), Suarez dhe Forlan.
Gjermania: Butt, Aago, Friedrich, Martesacker, Boateng, Khedira, Schweinsteiger, Jansen (Kroos), Ozil (Tasci), Cacau (Kiessling) dhe Muller.