Uruguaji – Holanda 2-3Shënues: Forlan 40′, Pereira 90′/ Van Bronkhorst 18′, Shnejder 70′, Roben 73′

URUGUAJI: Muzlera, M.Pereira, Viktorino, Godin, M.Kaseres, Perez, Arevalo, Gargano, A.Pereira (Abreu 78′), Forlan (Fernandez 84′), Kavani.

Trajner: Tabarez.

HOLANDA: Stekelenburg, Boulahrouz, Heitinga, Matijsen, Van Bronkhorst, Van Bomel, De Zeu (Van der Vart 46?), Roben (Elia 89′), Shnejder, Kait, Van Persi. Trajner: Van Marvijk.

Gjyqtar: Irmatov (Uzbekistan)

Kartonë të verdhë: Maksi Pereira, Kaseres, Shnejder, Van Bomel.

Holanda është finalistja e parë e Botërorit. Në Kejp Taun, “tulipanët” mundin 3-2 Uruguajin dhe tani presin fituesen e sotme të Gjermani-Spanjë. Ndeshje mëse e lehtë në pjesën e parë për skuadrën e Van Marvijkut, që kalon në epërsi në minutën e 18-të me Van Bronkhorstin dhe pastaj barazohen në minutën e 40-të nga Forlani (për faj edhe të Skekelenburgut). Amerikano-latinët këmbëngulin, por brenda 3 minutash Shnejder e Roben kalojnë në epërsi Holandën 3-1. Në minutat shtesë Maksi Perreira shënon golin e dytë, por nuk kishte më kohë për mrekullinë. Për Holandën është fitorja e dhjetë po në kaq ndeshje në 2010-ën, e 16-ta radhazi. Është finalja e tretë e Botërorit, pas atyre paraardhëse në 1974-ën dhe 1978-ën. Uruguaji në fushë me katër lojtarë të Serisë A, do të luajë më 10 korrik në Port Elizabet finalen për vendin e tretë dhe një ditë më pas, të dielën, Holanda në “Soccer City Stadium” të Johanesburgut, do të luajë për triumfin final. Sido që të shkojë gjysmëfinalja e sotme, Gjermani-Spanjë, kjo do të jetë fitorja e parë në një Botëror e një skuadre europiane jashtë Kontinentit të Vjetër.
HOLANDA PËRPARA - Pjesa e parë nuk është spektakolare, me përjashtim të dy goditjeve të paparashikuara për portierët respektivë, por që vlejnë barazimin 1-1, me skuadrat që e mbyllin në paqe pjesën e parë. Goditja e Van Bronkhorstit është “vdekjeprurëse”, ajo e Forlanit kurajoze, falë edhe bashkëpunimit të portierit Stekelenburg, që kishte dalë gabim. “Jabulani” ka sigurisht dorën e tij në të dy golat. Por në absolute Holanda nuk shkëlqen, ndonëse mbështetej nga një stadium i veshur thuajse i tëri në “portokalli”, që e shndërroi Kejp Taunin në një arenë të shtëpisë për formacionin e Van Marvijkut. Megjithatë holandezët e nisin mirë: pas një tjetër goditjeje të Kaitit, në minutën e 18-të ata gjejnë epërsinë: Van Bronkhorst shënon një super-gol nga një pozicion i prirët nga më shumë se 25 metra. Ata që ndoshta u trembën nga goditja e tij, në fund u panë të festojnë me kapitenin 35-vjeçar. Për anësorin e majtë, ky është Botërori i tretë dhe me golin fantastik, kurorëzon një karrierë të gjatë. Muzlera vetëm sa e prek topin, por nuk mund ta shmangë atë të hyjë në portë, teksa preku dhe shtyllën. Holanda përpara dhe stadiumi dridhet. Por skuadra favorite nuk insiston. Lodhet të gjejë përshtatjen mes Van Persit, Shnejderit e Robenit.

BARAZIMI “ÇELESTE” - Uruguaji reziston, pavarësisht nga mungesat e shumta të Fuçiles e Suarezit (të pezulluar), Luganos e Lodeiros (të dëmtuar). Në fillim kërkojnë një 11-metërsh për një faull ndaj Kavanit, pastaj barazojnë me Forlanin dhe asgjë më shumë. Është goli i katërt në këtë Botëror për bjondin e Atletikos së Madridit, që mbrëmë luajti si kapiten dhe në pjesën më të madhe të ndeshjes si organizator i ekipit të tij.
HOLANDA NDRYSHON - Dhe shtohet ndjeshëm presioni në pjesën e dytë. Van der Vart futet në vend të De Zeut, por rasti më i mirë është për Uruguajin. Boulharouz ngatërrohet dhe lëshon një pasim të gabuar pas, Kavani është aty, Stekelenburg shtyn me këmbë dhe Van Bronkhorst bëhet sërish vendimtar teksa shpëton portën e boshatisur me kokë nga goditja e Pereirës. Pastaj Forlan bëhet i rrezikshëm me një goditje standarde që grushtohet nga portieri.

SHNEJDER E ROBEN - Megjithatë supremacia holandeze do të vërehet me kalimin e minutave, ku trysnia sa vjen e bëhet më e madhe në portën e Muzlerës. Dhe goli i dytë vjen me Uezli Shnejderin, që shënon nga një pozicion i vështirë dhe topi mes disa devijimeve të mbrojtësve kundërshtarë (me Van Persin në pozicion të dukshëm jashtë loje) hyn në cepin ku nuk e arrinte dot Muzlera. Pas tri minutash, Holanda shënon sërish: një krosim nga e majta e Kaitit, gjen kokën e Robenit që si për çudi shënon me kokë (sikundër dhe Shenjderi ndaj Brazilit më 2 korrik në çerekfinale). Për një Uruguaj thuajse në gjumë, që bëri një figurë të keqe, nuk mjafton as goli në kohën shtesë i Perreirës, me Stekelenburgun akoma të pavëmendshëm. Holanda e shikon Botërorin një hap larg në pritje të kundërshtarit që do ta mësojë sonte.

Van Marvijk: Kemi një takim me historinë!Trajneri i Holandës, Bert Van Marvijk, e ka përshkruar arritjen e finales së Kupës së Botës si një krenari të pabesueshme. Holandezët fituan 3-2 ndaj Uruguajit në gjysmëfinalen e luajtur të martën në mbrëmje më Kejp Taun, duke fituar një vend në finale, pas atyre të humbura nga ekipi i futbollit total në vitet 1974 dhe 1978. Uezli Shnejder dhe Arjen Roben shënuan golat vendimtarë për “tulipanët” në
pjesën e dytë, pasi më parë Diego Forlan barazoi avantazhin e Xhovani Van Bronkhorstit. Van Marvijk është kritikuar për stilin e lojës, në krahasim me të kaluarën “portokalli”, por ai bën pjesë në histori dhe mund të shprehë lumturinë pas vërshëllimës së fundit të gjyqtarit Irmatov.

TRAJNERI - “Kjo që kemi arritur është diçka e jashtëzakonshme. Na janë dashur të presim 32 vjet dhe tani një vend i vogël si i yni është sërish në finalen e Kupës së Botës, - tha Van Marvijk, i cili nuk është i ngopur pas suksesit ndaj Urguajit dhe sheh nga finalja. - Nuk mendoj për atë që ndodhi ndaj Uruguajit, por mendoj vetëm për finalen. Do të bëjmë më të mirën tonë, sepse kemi një mision për të përmbushur dhe ende nuk ia kemi dalë. E nisëm ndeshjen ngadalë, pastaj u zgjuam në pjesën e dytë. Gjithsesi, duhet ende të përmirësohemi për të fituar ndeshjen e fundit. Kemi një takim me historinë.”

SHNEJDER - Ndërkohë, pas ndeshjes Uezli Shnejder është i lumtur, më i lumtur se kur fitoi Ligën e Kampioneve me Interin. Golashënuesi më i mirë i Botërorit qëndron me këmbë në tokë, por pranon: “Duhet të vazhdojmë punën, edhe pse nuk kam ndjerë asnjëherë një kënaqësi më të madhe se kjo. Të fitosh me ekipin kombëtar është krejtësisht ndryshe, në krahasim me klubet. Ndaj Uruguajit na u desh të luftonim dhe të saktifikonim, por ia dolëm dhe tani jemi në finale. Jemi gati të bëjmë gjithçka për ta fituar atë ndeshje, por nuk ka ardhur momenti për të festuar. Jemi një hap larg historisë.”

Roben: Gjermani apo Spanjë, është njëlloj
Arjen Roben është në qiellin e shtatë pas fitores 3-2 ndaj Uruguajit. Talenti holandez i Bajernit të Mynihut shijon arritjen në finalen e Kupës së Botës 2010. “E dinim që do të ishte një ndeshje e vështirë, - tha autori i golit të tretë për “tulipanët”. - Në pjesën e parë vuajtëm, por në 45 minutat e dyta nisëm t’i bëjmë gjërat ashtu si dimë dhe gjithçka shkoi në anën tonë. Jemi një skuadër e madhe, por mund të bëhemi e paharrueshme nëse fitojmë finalen.”
Kundërshtari i Holandës më 11 korrik do të jetë Gjermania ose Spanja. Roben nuk ka preferenca: “Gjermania dhe Spanja janë skuadra të mëdha, por për mua është njëlloj e vështirë.”

Tabarez: Dhamë gjithçka, ikim me kokën lartBotërori 2010 mbyllet në gjysmëfinale për Uruguajin, pas humbjes 3-2 ndaj Holandës, mbrëmë në Kejp Taun. Skuadra e vetme joeuropiane e mbetur në garë, mund të ngjitet në podium nëse fiton të shtunën në “finalen e vogël” për vendet 3-4. Pas ndeshjes së djeshme “babai” i uruguajanëve, Oksar Uashington Tabarez mbron skuadrën e tij: “Largohemi nga Afrika e Jugut me kokën lart. Dhamë gjithçka që kishim në mundësitë tona dhe jam krenar për këta djem. Fitoi Holanda sepse ishte më e mirë.”

Pjesa e parë u mbyll në barazim 1-1, ndërsa goli i dytë për Holandën u shënua në mesin e pjesës së dytë nga Uezli Shnejder. Në trajektoren e topit të goditur nga mesfushori ndodhej Robin Van Persi në pozicion jashtë loje, që shqetësonte pamjen e portierit Muzlera. Në lidhje me këtë episod, Tabarez tha: “Ishte pozicion jashtë loje. Jepet si i tillë, sepse sulmuesi shqetësonte pamjen e portierit tonë. Padyshim që ai gol ishte i parregullt, por unë nuk duam të merrem me gjyqtarët, sepse në fund të fundit mendoj se Holanda ishte më e fortë dhe e meritoi kualifikimin. Ne u shtërnguam dorën atyre, pavarësisht nga trishtimi dhe u uruam atyre fat në finale.”

Diego Forlan: Realizuam objektivin tonë
Sulmuesi i Uruguajit, Diego Forlan, largohet me kokën lart nga Kupa e Botës 2010, pasi dje shënoi golin e tij të katërt në këtë veprimtari, në ndeshjen e humbur 3-2 ndaj Holandës në gjysmëfinale. “Arritja në gjysmëfinale e përmbysi misionin tonë, - tha lojtari i Atletikos së Madridit. - Populli uruguajan është krenar për këtë ekip dhe kjo na mbush me lumturi. Holanda e meritoi finalen, por për mënyrën si luajtëm them se po të kishim qenë ne finalistët, nuk do të kishim vjedhur asgjë.” Diego Forlan ka shënuar një gol më pak se Uezli Shnejder dhe David Vila, të cilët janë në garë për “Këpucën e Artë” të Botërorit 2010.