Vetëm pak ditë pasi serbët kishin hyrë me dhunë në pikën kufitare të Jarinjës, duke mos dashur të tregojnë dokumentet e identitetit të tyre, 900 motoristë qytetarë serbë kanë kaluar të shtunën pikën kufitare në veri të Kosovës, por kësaj radhe të gjithë ata i janë nënshtruar kontrollit nga policia e Kosovës dhe ajo e EULEX-it.

Zëdhënësi i Policisë së Kosovës, Baki Kelani, ka theksuar se kontrolli i motoristëve serbë është bërë nga pjesëtarë të Policisë së Kosovës dhe asaj të EULEX-it dhe se nuk ka pasur asnjë problem deri më tani, raporton RTV21.

Ndërkaq, jo zyrtarisht mësohet se një grup prej 100 motoristësh serbë do të kalojnë në pjesën jugore, për të arritur në manifestimin në Gazimestan, ku serbët të hënën do të festojnë betejë e humbur të Kosovës.

“Policia e Kosovës ka kryer të gjitha përgatitjet për të ruajtur rendin dhe sigurinë me rastin e Ditës së Vidovdanit”, ka thënë zëdhënësi i Policisë së Kosovës, Baki Kelani.

Ministri i Punëve të Brendshme të Kosovës, Bajram Rexhepi, dje ka paralajmëruar që askush nuk do të mund të hyjë në Kosovë pa u legjitimuar më parë.

Ndërsa, mediet serbe njoftojnë se disa qindra qytetarë serb të Mitrovicës kanë pritur dje motoçiklistët, të cilët kanë ardhur në kuadër të organizimit të një koncerti humanitar.

Kolona e motoçiklistëve, e gjatë disa kilometra, ka arritur në Mitrovicë dje rreth orës 19.

Motoçiklistët për Vidovdan, më 28 qershor, do të vizitojnë edhe Gazimestanin, njoftojnë mediet serbe.