Kombëtarja e Argjentinës mposhti me rezultat 3:1 Meksikën dhe në çerekfinale takohet me kombëtaren e Gjermanisë.
Kombëtarja e Argjentinës shënoi fitore me rezultat 3:1 në ndeshjen e të tetës së finales së Kampionatit botëror në përballje me Meksikën, e cila u zhvillua në stadiumin "Soccer City" në Johannesburg. Në 45 minutat e parë të ndeshjes argjentinasit luajtën shumë më mirë, përveç që shënuan dy gola, krijuan edhe shumë raste. Në minutën e 26-të, Argjentina kaloi në epërsi nëpërmjet një pozite të dyshimtë jashtë loje.



Messi në një tollovi e gjen Tevezin, i cili me kokë ka futur topin në rrjetë dhe 1:0. Ndërkohë, futbollistët e Meksikës protestuan ashpër në vendimet e gjyqtarëve, por gjyqtari Rosseti vendosi që topi duhet të niset nga qendra. Në vazhdim të takimit, Argjentina mbizotëroi me lojë, ndërsa Meksika luajti paksa e shpërqendruar.



Një gabim i madh i mbrojtësit Osorios, nga i cili përfitoi Higuain, duke ia vodhur topin dhe shënuar për rezultatin 2:0 pikërisht në minutën e 33-të. Ky është edhe goli i katërt në botëror i Higuainit. Pjesa e parë e ndeshjes mbyllet me shifra 2:0 në favor të Argjentinës. Pas përfundimit të pjesës së parë pati edhe tensione në mes futbollistëve argjentinas dhe meksikanëve, megjithatë, qetësohen gjakrat.



Në minutën e 52-të, Tevez me një lëvizje dinake nga rreth 25 metra ka shënuar evrogol, duke e mposhtur portierin Perez dhe 3:0. Ky ishte edhe goli më i bukur i shënuar deri më tash në botëror. Në minutën e 60-të, Meksika pati rast të mirë, por Barrera nuk u tregua i shkathët dhe gjuajti jashtë portës.



Meksika më në fund shënoi gol. Torrado për bukuri pason topin deri te Hernandez, i cili për mrekulli merr një top, duke u liruar në mes dy futbollistëve argjentinas brenda 16-shit, me gjujatje të fortë plason topin në këndin e epërm dhe 3:1 pikërisht në minutën e 71-të. Në minutën e 92-të, Messi nga 16-17 metra rrezikoi portën meksikane, por Perez me mund të madh dëboi në korrne. Argjentina shënoi fitore me rezultat 3:1 dhe kualifikohet në çerekfinale, ndërsa Meksika eliminohet nga botërori. Kombëtarja e Argjentinës (me 3 korrik) në çerekfinale do të takohet me kombëtaren e Gjermanisë.

B o x 1

Argjentina-Meksika 3:1 (2:0)

Stadiumi "Soccer City", Johannesburg.
Gjyqtar: Rosseti.
Shikues: 84.300.
Shënues: Tevez (26' e 52'), Higuain (33') për Argjentinën dhe Hernandez (71') për Meksikën.
KV: Marquez (ME).
Argjentina: Romero, Demichelis, Burdisso, Heinze, Di Maria (Guetierrez), Higuain, Messi, Tevez (Veron), Mascherano, Otamendi, Rodriguez (Pastore).
Meksika: Perez, Rodriguez, Salcido, Marquez, Osorio, Torrado, Hernandez, Juarez, dos Santos, Guardado (Franco), Bautista (Barrera).