Kombëtarja e Portugalisë ka bërë një lojë pothuajse të përkryer në pjesën e dytë të ndeshjes, për të “shtypur” Korenë e Veriut, me një fitore të thellë 7-0, dhe për të siguruar një vend në rundin e ardhshëm të Kupës së Botës. Edhe pse pati 15 raste për shënim, pjesa e parë solli vetëm një gol të vetëm. Pas një asisti të Thiago, në minutën e 29-të të lojës, Raul Meireles kaloi ekipin portugez në epërsi, për ta çuar të qetë në pushimin mes dy pjesëve. Portugezët filluan edhe pjesën e dytë me shumë vrull, duke shënuar tre gola të shpejtë. Tetë minuta sapo kishte nisur pjesa e dytë, ishte Simao, që dyfishoi epërsinë pas një loje të mirë nga Hugo Almeida, dhe Meireles (53’), ndërsa pas tre minutash të tjera në listën e golashënuesve u shënua Almeida (56’). Hovi i portugezëve nuk ndaloi, pasi kur u bënë një orë lojë në stadiumin “Ellis Park”, në Johannesburg, Ronaldo shmangu pozicionin jashtë loje për të asistuar Thiagon, që shënoi golin e katërt në ndeshje (60’).
Pas njëzet minutash pa gola, rrjetat përsëri u tundën tri herë në 10 minutat e fundit. Së pari Liedson, shënoi me anë të një goditjeje të fuqishme (81’), para se në listën e shënuesve të shkruhet edhe Cristiano Ronaldo (88’) dhe për të dytën herë Thiago (89’).
Fitorja tashmë i siguron Portugalisë kualifikim në rundin e ardhshëm, ndërsa vendi i parë do të vendoset në rundin e fundit të fazës grupore, kur kjo kombëtare do të përballet me Brazilin.