Zv. Kryeministrit dhe Ministrit të Punëve të Jashtme të Shqipërisë, Ilir Meta, pas vizitës së tij në Gjermani ka deklaruar se mbështetja e Gjermanisë për Shqipërinë do të vazhdojë të konkretizohet. "Kjo vizitë në Berlin tregon se vazhdimisht, marrëdhëniet midis Gjermanisë dhe Shqipërisë, vijnë duke u përforcuar, vijnë duke u konkretizuar, tregues i së cilës ishte edhe nënshkrimi gjatë kësaj vizite edhe i Marrëveshjes për transportin Detar midis dy vendeve tona" tha Meta.

Më tej Meta deklaroi "U konfirmua se ndihma për Shqipërinë nuk do të cënohet, përkundrazi, do të vazhdojë sipas të gjitha premtimeve dhe angazhimeve të marra më parë, ashtu sikurse mund të them se vëmendja tashmë do të drejtohet më shumë për të tërhequr investitorët e rëndësishëm gjermanë në vendin tonë. Kjo pasi dihet se ata sjellin jo vetëm teknologjinë më të avancuar, por sjellin edhe zhvillim. Dhe në këtë drejtim, mbështetja si e Ministrit të Jashtëm dhe Zv. Kancelarit, Westerwelle dhe e Sekretares së Shtetit për Bashkëpunimin Ekonomik, Kopp, dhe e gjithë të tjerëve, ka qenë mjaft evidente".