Në ceremoninë e diplomimit të gjeneratës së 2010, në Universitetin Amerikan të Kosovës, Soren Jesen Petersen, ish përfaqësues i OKB-së në Kosovë, tha dje se së shpejti flamuri i Kosovës do të valojë bashkë me flamujt e 192 shteteve tjera anëtare të OKB-së, njohtojnë mediat kosovare.
Kosova është vendi në të cilin i ka kaluar dy nga vjetët më të çmuara, ka thënë ai. “Skeptikët në Evropë do të kuptojnë se kanë nevojë për ju më shumë se që ju keni nevojë për Evropën”, theksoi Petersen.
“Puna juaj do të ndikojë në heqjen e imazhit negativ të konfliktit, korrupsionit dhe krimit për rajonin. Unë e njoh mirë popullin e Kosovës dhe e kuptoj se imazhet e tilla janë të padrejta. Unë e di se virtytet e shumicës po e paguajnë çmimin e lakmisë së një grupi të vogël të njerëzve”, vlerësoi Petersen.
Duke folur në këtë ceremoni, presidenti i Republikës së Kosovës, Fatmir Sejdiu tha se Kosova “sot është më afër standardeve bashkëkohëse duke u bërë pjesë e një tregu ndërkombëtar ku dominon cilësia dhe konkurrenca.
Presidenti tha se shumë ekspertë të rinj nga Kosova dhe rajoni që janë fryt i Universitet Amerikan të Kosovës janë bërë edhe kontribuues aktivë në zhvillimin e Kosovës dhe të rajonit.
“Sot, kur më nuk ekzistojnë barrierat që ne si gjeneratë e mëhershme i kemi pasur, duam që të gjithë të rinjtë dhe të rejat tona të bëhen konkurrentë me moshatarët e tyre në Evropë dhe botë. Një popullatë e re dhe e arsimuar mirë do të jetë çelësi kryesor në realizimin e shumë reformave të nevojshme për zhvillimin e vendit tonë. Vetëm me kuadro të përgatitura me dije bashkëkohore do të mund t’i menaxhojmë vetë shumë projekte, të cilat çojnë në një prosperitet më të mirë për të gjithë”, theksoi presidenti Sejdiu.
Ndërsa ambasadori Uiliam Uaker e cilësoi Petersenin si përfaqësuesin special të KB, më të suksesshëm në Kosove.