Komisioneri për Zgjerimin dhe Fqinjësinë në BE, Stefan Fule, u shpreh sot se propozimi i KE-së për udhëtimin pa viza për Shqipërinë dhe Bosnjën-Hercegovinën është me rëndësi të madhe.

Sipas tij, ky vendim i sjell këto vende më pranë Bashkimit Evropian.

"Ky propozim për udhëtim pa viza është me rëndësi të madhe për shtetasit e vendeve në fjalë, pasi do t'i sjellë ata më pranë BE-së. Regjimi pa viza do të ndihmojë për ta bërë perspektivën evropiane më të prekshme", shprehet Fule në një deklaratë të shpërndarë sot.

“Kam po aq besim sa komisionerja Malstrom se autoritetet përkatëse kombëtare në Shqipëri dhe Bosnjë-Hercegovinë së shpejti do të mund të plotësojnë kërkesat e mbetura dhe do të vazhdojnë të garantojnë rezultate të qëndrueshme në zbatimin e udhërrëfyesve", përfundon komenti i komisionerit Fule pas miratimit të rekomandimit të KE-së për vizat.