UPDATE-Negociatat për zgjidhjen e krizës politike kthehen në pikën zero. Investimi i Bashkimit Europian dhe Këshillit të Europës me një delegacion ekspertësh nuk ka mundur të bindë të paktën për ditën e parë të bisedimeve palët që të bien në ujdi mbi një zgjidhje të pranueshme për realizimin e transparencës për zgjedhjet e shkuara parlamentare. Dy takimet e veçanta të zhvilluara fillimisht me kreun e qeverisë Sali Berisha dhe më pas me kreun e opozitës Edi Rama, pavarësisht konfidencialitetit të rreptë, mësohet se nuk kanë dhënë asnjë rezultat, ndërsa mbeten ende të hapura mundësitë gjatë bisedimeve që pritet të mbahen edhe gjatë ditës sotme si për kutitë e materialeve zgjedhore ashtu edhe ato të votimit.

Takimi me Berishën

Takimi mes delegacionit të Bashkimit Europian dhe kryeministrit Berisha për krizën politike dhe qeverisëse që ka bllokuar Shqipërinë ka zgjatur për më shumë se dy orë dhe ka pasur disa momente tensionimi. Edhe pse të dyja palët kanë vendosur që zyrtarisht të mos kenë asnjë komunikim me median në lidhje me këtë takim, burimet pranë kryeministrisë kanë pohuar se biseda ka qenë e nxehtë dhe ndërkombëtarët kanë kundërshtuar dy nga pikat ku kryeministri Berisha nuk ka ndër mend të tërhiqet (materialet zgjedhore dhe djegia e fletëve) si dhe kanë diskutuar për pikën e tretë dhe atë më të rëndësishme, fletët e votimit. Ata kanë kundërshtuar mënyrën se si Berisha ka ofruar hapjen e kutive për të parë materialet zgjedhore. Kryeministri ka ofruar zgjidhjen nëpërmjet arkivit, një procedurë aspak transparente dhe që nuk siguron asnjë garanci për opozitën por edhe duket e pakuptimtë për ndërkombëtarët. Sipas tyre, hapja e kutive duhet të vijë si pasojë e një dialogu politik ku të caktohen qartë modalitetet e komisionit hetimor. Pika tjetër e debatuar ka qenë djegia apo jo e fletëve të votimit. Kryeministri ka insistuar se Kodi Zgjedhor parashikon djegien e fletëve të votimit ndërsa dërgimin e materialeve në arkivin e shtetit. Por Kodi nuk përcakton asnjë datë ose afat për djegien e fletëve. Pika 6 e nenit 178 të Kodit (djegia e fletëve) është bërë në funksion të zgjedhjeve të ardhshme që kutitë të jenë gati kur të bëhen votimet e tjera. Zgjedhjet e ardhshme janë ato vendore në vitin 2011 dhe, sipas ndërkombëtarëve, nuk ka asnjë ngut për të djegur fletët e votimit deri sa për to të vendosë Komisioni i Venecias. Pikërisht rruga e fletëve të votimit deri në "Venecia" përmes një kërkese të kryeparlamentares Topalli, që do të ishte thelbi i marrëveshjes politike, apo përmes Gjykatës Kushtetuese që lihet në dorë të një institucioni të kontestuar fuqishëm nga opozita dhe ndërkombëtarët, do të jenë pjesa më e fortë e negociatave të ditëve të ardhshme.

Takimi me Ramën

Menjëherë sapo kanë lënë selinë e kryeministrit ekspertët e BE-së, KiE dhe Komisionit të Venecias të kryesuar nga Jana Sindelkova, zv/shefja e Kabinetit të Komisionerit të Zgjerimit, Stefan Fule kanë bujtur në zyrën e kryetarit të PS-së Edi Rama. Takimi ka zgjatur për afro 90 minuta, pra afro 30 minuta më pak sesa ai me kryeministrin. Kreu socialistë Edi Rama ndryshe nga sa u prezantua në darkën e Strasburgut, dje përveç deputetes Vasilika Hysi shoqërohej në këtë takim edhe me Damian Gjiknurin, një njohës i mirë i çështjeve zgjedhore dhe një nga bashkëhartuesit e Kodit Elektoral. Vet përfaqësimi në një nivel të tillë teknikësh, njohës të Kushtetues dhe ligjit zgjedhor, por edhe përfaqësimi i ndërmjetësve evropianë flet qartë se bisedimet kanë qenë të karakterit teknik. Me gjithë se askush nuk ka pranuar të bëj të ditura rezultatet e këtij takimi, burime pranë tij kanë konfirmuar vetëm faktin se gjatë bisedimeve të mbrëmshme nuk është arritur asgjë konkrete dhe se palët gjenden ende larg në qëndrimet e tyre. Kështu socialistët mësohet se i kanë qëndruar dy kërkesave të tyre, hapje e kutive të materialeve zgjedhore dhe në varësi të tyre të bëhet dhe verifikimi i fletëve të votimit. Çka lë të kuptohet qartë se gjatë këtij takimi, pala socialiste ka qenë e prerë se fletët e votimit nuk duhet të digjen. Pas takimit që ka mbaruar në orën 22 e 30 minuta, përfaqësuesit europianë nuk kanë pranuar të deklarojnë asgjë, ndërsa përfaqësuesi i Komisionit Europian në Tiranë, Helmut Lohan nuk ka nguruar të bëj truprojën e vartëses së Fules duke ndalur gazetarët që ti afroheshin asaj. Fejzi Braushi
__________________

25 Maj


Rama: Jemi gati, zgjidhja eshte ne tavoline
Kryetari i Partisë Socialiste ka deklaruar se zgjidha është në tavolinë dhe pala tjetër duhet ta firmosë. "Ne jemi gati për zgjidhje por pala tjetër nuk duhet të fshihet pas alibive", tha ai gjatë një konference për shtyp nga selia e PS-së.


Ndërsa u ndal edhe tek deklarata e djeshme e ambasadorit amerikan në Tiranë, John Withers, i cili deklaroi se kriza në Shqipëri është e qeverisjes. Po kështu ndau të njëjtin mendim me Withers edhe për vendimin dysheus të Kuvendit për rrëzimit e kandidatit të Kushtetues, Vangjel Kosta.


"Ambasadori amerikan tha publikisht dje se kriza e thellë ku po zhytet Shqipëri kërkon zgjidhje dhe opozita është e gatshme të bëjë zgjidhje pa cënuar tranparencën dhe në përputhje me Kushtetutën e vendit. Shqipëria s'mund të tërhiqet në krizën e thellë që i ka rrënjët në kutitë e mbyllura", tha ai.


Ndërsa për rrëzimin e kandidatit të Topit për në Kushtetuese, Rama u shpreh se ndaj të njëjtin mendim me qeverinë e SHBA-së mbi gjendjen e drejtësisë. "Prirja për të nënshtruar drejtësinë përmes rrëzimit të konstitucionalistit Vangjel Kosta për motive të errta në këtë kohë krize të thellë është një shqetësim i madh. Duhet respektim, jo arrogancë, dialog dhe jo politikë destruktive, zgjidhje dhe jo thellim i krizës".


Në fund Rama apeloi për zgjidhje, duke thënë se kompromisi është në tavoline. "Zgjidhja e kompromisit është në tavolinë si shprehje e vullnetit tonë të mirë dhe e vetëdijes sonë politike e qytetare për nevojën e madhe që ka Shqipëria sot për t'u çliruar nga pesha e krizës së mungesës së transparencës".


"Ne jemi gati për zgjidhjen, pala tjetër s'ka pse fshihet pas alibive që tanimë janë rrëzuar dhe as duhet ta vonojë pranimin e zgjidhjes duke u faturuar shqiptarëve pasoja krejt të pamerituara e duke shtuar peshën e krizës në kurriz të interesave të vendit dhe me pasoja të pallogaritshme në rrugën e integrimit evropian".


Nje dite me pare kreu i PS-se Edi Rama gjate mbledhjes me deputetë, drejtues të partisë si dhe qytetarë që morën pjesë në grevën e urisë u shpreh se falë grevës ra tabuja, "de facto" kutitë u hapën. Ai kerkoi qe zgjidhja te behet brenda dy javeve pa kuti te mbyllura dhe flete te djegura, ndryshe opozita do t'i rikthehet protestave.



________






23 Maj

Kreu socialist, Edi Rama, është i bindur se kutitë do të hapen dhe se transparenca e zgjedhjeve të 28 qershorit do të kryhet, për të mos lënë më vend që në zgjedhjet e ardhshme të ripërsëritet fenomeni i vërejtur në Ruzhdie. Tryeza e Strasburgut, sipas tij, pati produktin e vet në drejtim të zhbllokimit të situatës dhe tashmë ajo që mbetet për tu bërë është thjeshtë çështje procedurash. "Falë sakrificës së madhe të atyre burrave dhe grave, djemve dhe vajzave që ndërmorën hapin për të hyrë në një grevë urie, ne sot jemi besimplotë duke u nisur nga fakti që kutitë do hapen. Mbetet për të diskutuar dhe zgjidhur sesi do të procedohet konkretisht. Por, tani më është e qartë se të gjitha Ruzhdiet e Shqipërisë nuk do të mbeten më në errësirën e kutive të mbyllura", - tha Rama gjatë bashkëbisedimit me gazetarët, teksa ka theksuar se beteja për transparencën është në pikën më kulmore të saj. Transparenca, sipas tij, do të realizohet nëpërmjet një hetimi parlamentar që do të mund të ketë akses të plotë dhe mundësinë që të nxjerrë në dritë, gjithçka ka të bëjë me mekanizmin famëkeq të Ruzhdies. Shekulli