Procesi i ekstradimit të vrasësit të mësuesit zviceran, Dedë Gecaj nga Kosova në Zvicër, është në rrjedhë e sipër, shkruajnë shumica e medieve zvicerane. Para pak ditësh ai u arrestua nga policia kosovare, ndërsa Gjykata vendore e Pejës, e udhëhequr nga një gjykatës i Eulex-it, atij i ka caktuar një paraburgim prej 30 ditësh. Këtë për të përditshmen zvicerane "20 Minuten" e ka konfirmuar zëdhënësja e Eulex-it, Kristiina Herodes. Sipas një zëdhënësi të Ministrisë kosovare të Drejtësisë, ekstradimi i Dedë Gecaj është në rrjedhë e sipër dhe se gjatë dirave të ardhshme, pas plotësimit të disa formaliteteve juridike, ai do t’i dorëzohet organeve gjyqësore zvicerane. "Se Kosova do ta ekstradojë Dedë Gecajn, është e padiskutueshme. Rasti i ekstradimit të Bashkim Berishës dëshmon se autoritetet kosovare duan një kooperim me Zvicrën. Po që se me ekstradimin e Gecajt gjithçka shkon si duhet, do të jetë ky një sukses i madh për Kosovën", ka deklaruar Folco Galli nga Ministria zvicerane për Drejtësi. Përndryshe, sipas versionit zviceran, Dedë Gecaj ka dhunuar seksualisht të bijën e vet, e më pas ka vrarë mësuesin zviceran Paul Shpirig, Gecaj ka vrarë mësuesin e Besarta Gecaj në vitin 1999, pasi ai ishte vënë në dijeni nga vajza, se ishte dhunuar seksualisht në mënyrë sistematike nga mësuesi i saj. Që nga ajo kohë, vajza është marrë në mbrojtje të shtetit zviceran, duke iu ndryshuar identiteti dhe mohuar e drejta për tu takuar me pjesëtarët e tjerë të familjes.