Njohjet e deritashme janë sukses i Kosovës dhe meritë e gjithë
sakrificave të popullit të Kosovës, por një numër i madh i këtyre
shteteve që na kanë njohur janë ato shtete ku unë kam lobuar fuqishëm,
ka thënë në një intervistë për Kosovapress, kryetari i Aleancës Kosova e
Re, Behgjet Pacolli, duke shtuar se më tepër se 17 njohje janë meritë e
tij. Ai thekson se në dhjetëditëshin e muajit qershor do të ketë njohje
të reja për Kosovën.

-- Z.Pacolli, patëm një njohje të re, atë të Somalisë, për të cilën
edhe ju keni dërguar një falënderim. A keni kontribuar ju në këtë
njohje?

Pacolli: Së pari njohja është e mirëseardhur për Kosovë. Njohja nuk
është për AKR-në, njohja është për qytetarët e Kosovës. Somalia ka qenë
dhe mbetet vendi ku kemi lobuar dhe nuk kemi munguar që ta falënderojmë
për njohjen e Kosovës. Ka ndodhë një mrekulli, një surprizë e mirë, në
momentet kur presidenti ynë ishte në Kuala Lumpur dhe ministri i Punëve
të Jashtme ishte në Nju Jork për të njëjtën kauzë dhe ne kështu së
bashku duhet të veprojmë edhe më tutje në mënyrë që t’i sjellim Kosovës
sa më shumë njohje. Njohjet janë shumë të rëndësishme për Kosovën. Me
çdo politikan të spikatur, të njohur botëror që kam folur deri më tani,
ata kanë thënë që ju duhet të shfrytëzoni çdo energji që posedoni në
mënyrë që të sillni njohje dhe Kosovën ta sillni në bankat e Asamblesë
ku ulen të gjitha kombet e botës.

-- A jeni lodhur nga lobimi, nga trokitja nëpër dyer të zyrave apo
ambasadave të huaja për të kërkuar njohjen e Kosovës?

Pacolli: Unë trokas pak nëpër ambasada të tjera. Siç e keni parë prej
historikut të lobimit tim, unë gjithmonë kam tagetuar njerëzit kryesorë
që kanë vendos për shtetet. Unë jam takuar gjithmonë me president të
ndryshëm, me kryeministra të shteteve të ndryshme, prej ku kam kërkuar
njohjet dhe te lobimi diku mbi 90 për qind janë realizuar, gjegjësisht
janë në realizim e sipër njohjet. Tani do të kem një vizitë në Francë
nga 28 deri më 30 maj, ku do të takoj disa burrështetas të shteteve më
të mëdha Afrikane, Kongos, Zimbabvesë, Mozambikut, Tanzanisë, Kenisë,
Ganës po ashtu dhe jam i bindur që prej tërë kësaj pune do të vijnë edhe
njohjet ashtu siç kam premtuar. Ne presim në dhjetëditëshin e parë të
muajit të ardhshëm presim njohje të reja tani prej shteteve pak më të
mëdha, sepse kam parë që ka pasë disa kritika se këto shtetet e vogla
Ministria e Punëve të Jashtme nuk po mund t’i gjejë në hartë. Tash janë
shtete më të mëdha dhe e kanë më lehtë t’i gjejnë ato.

-- Si po ndiheni kur nga institucionet e Kosovës në njëfarë forme po
kontestohet angazhimi juaj për lobim?

Pacolli: Unë absolutisht nuk merrem me këtë. Le të kontestohet prej
tyre, por e di një që këto njohje nuk janë as për AKR-në as për
Ministrinë e Punëve të Jashtme, por janë për qytetarin e Kosovës, për
shtetin e Kosovës dhe njohje që e dëshmojnë sovranitetin e Kosovës dhe
sovraniteti i Kosovës ka qenë qëllimi i krejt qytetarëve të Kosovës. Kjo
më gëzon mua që punoj për këtë kauzë, ashtu siç kam punuar edhe përpara
në lobimin tim për pavarësinë e Kosovës në atë intensitet, bile edhe më
tepër tani punoj për dëshmitë e sovranitetit të Kosovës.

-- A keni pasur ndonjëherë ndonjë presion, qoftë privat, që ju mos të
loboni në emër të Kosovës?

Pacolli: Jo nuk kam pas, pos këtyre stupcave gjatë rrugëtimit tim,
diku tentativa ka pasë, jo ndonjë telefonatë e ndokujtë te ambasadat e
Kuintit, apo diçka tjetër, ose një koment shembull se gjoja ja pasna
përmend emrin dikujt dhe paskam shkuar në një ambasadë të Iranit në
SHBA. Pos këtyre problemeve banale që kanë qenë, nuk kam pasur tjera.
Unë gjithmonë jam vet inkurajuar dhe prej miqve të Kosovës jam
inkurajuar dhe këtë jam duke e bërë me një energji të pashtershme.

-- Po rasti me presidentin Sejdiu?

Pacolli: Sa i përket këtij incidenti të cilin unë nuk e kam
provokuar, së pari shkrimin në Express e kanë gjetë diku tjetër, jo nga
unë dhe unë vetëm jam përgjigjur për atë rast. Nuk ka qenë pyetje po
ashtu se presidenti më ka qortuar dhe më ka thënë pse e ke përdorë emrin
tim. Edhe këtë e kisha amortizuar, por nuk mund ta amortizoj një se e
tërë kjo e ka pasur një prapavijë. Sepse vetë prurja në pah e emrit
Iran, ambasada e Iranit në Uashington, e ka pasë një prapavijë dhe unë
jam rebeluar kundër kësaj prapavije, se informata me prapavija të tilla
në dëm timin ka pasë gjithmonë nga disa njerëz të caktuar. Për këtë jam
rebeluar dhe unë jam gjithmonë i gatshëm të mbështes çdo iniciativë të
presidentit edhe Qeverisë, edhe pse unë tani kërkoj dorëheqjen e tyre,
të mbështes kur është interesi i qytetarëve të Kosovës. Për këtë jam i
betuar. Jam i betuar po ashtu kësaj qeverie, siç e kam mbështetur deri
tash shpirtërisht t’i them tani se ka ardhur koha kur kjo qeveri duhet
të shkojë në shtëpi, sepse nuk ka më çka të ofrojë.

-- Pse duhet të shkojë në shtëpi kjo qeveri?

Pacolli: Janë shterrur mundësitë e kësaj qeverie. Tash ka një
pakënaqësi të tmerrshme tek qytetarët ndaj kësaj qeverie. Tash edhe pse
dikush thotë se ka transparencë, nuk kemi transparencë, sidomos kur
është në pyetje trajtimi i pronës shoqërore dhe asaj publike.

-- Çka ju lidh juve me shtetet afrikane e arabe, me shtetet e vogla
ku ju kryesisht loboni?

Pacolli: Mua më lidh vetë fakti se prej demokracive të mëdha
evropiane, Shteteve të Bashkuara të Amerikës, Kanadasë, Japonisë, ne
kemi pasur njohje automatike që kanë ardhur menjëherë pas deklarimit të
pavarësisë dhe Afrika ka mbetur ashtu e padefinuar. Ka mbetur për arsye
se Afrika gjithmonë mendonte se Jugosllavia është e tërë dhe lidhjet e
Beogradit me shtetet Islamike, gjegjësisht afrikane ka qenë
jashtëzakonisht e madhe, kanë pasur studentë atje etj, dhe këto shtete
kanë qenë pasive sa i përket kësaj. Edhe gjatë bisedimit tim me
presidentë të ndryshëm të këtyre shteteve, gjithmonë janë përmendur
lidhjet e tyre me Beogradin që gjithmonë është ndjerë një nostalgji që
këto vende kanë pasur prej lidhjeve të Titos që ka pasur atëherë, por
unë gjithmonë kam shkuar dhe iu kam treguar se nuk ekziston më
Jugosllavia, se Beogradi është një prej shtatë kryeqyteteve të ish-
Jugosllavisë dhe aty kam koncentruar energjinë time dhe kur ke vullnet
që të arrish diçka, ku harxhon energji të madhe, aty është edhe
rezultati.

-- A e keni provuar të loboni tek vendet e ish- Bashkimit Sovjetik?

Pacolli: Unë atje jam gjithmonë. Unë e di problemin e këtyre
shteteve. Këto shtete janë, sigurisht po ju them, pro Kosovës. Pse pro
Kosovës? Sepse këto shtete kanë qenë të parat që i kanë pranuar
pasaportat e UNMIK-ut atëherë, tash i pranojnë pasaportat e Kosovës dhe
nuk shoh asnjë problem në qëndrimin e tyre. Por ekziston një ndërlidhje
ekonomike me Rusinë që këto shtete ende janë të ndërlidhura ekonomikisht
me Rusinë dhe ardhja e problemit të dy shteteve të reja që i quan Rusia
tani, Abkhazisë dhe Osetisë, këto janë bërë si kusht për këto shtete,
nëse këto shtete e njohin Kosovën, t’i njohin edhe këto dy shtete.

Këto republika të Azisë Qendrore, të cilat kanë marrëdhënie të mira
edhe me Gjeorgjinë edhe me bashkësinë ndërkombëtare perëndimore, i kanë
thënë Rusisë se ne nuk do t’i njohim këto shtete. Unë besoj se edhe aty
është një nyje që duhet të zgjidhet. Por unë jam gjithmonë për atë që ne
edhe më tutje të bashkëpunojmë me këto shtete. Pak a shumë mua me
pengon fakti pse ne nuk kemi qenë paralelisht me forumin e Kuala
Lumpurit, edhe në Dushan Be. Nëse në Kuala Lumpur kanë qenë dhjetë, në
Dushan Be kanë qenë 100. Dushan Be ka qenë forumi më i madh i shteteve
islamike dhe aty ka mund të lobohet. Por unë besoj se lobistët e mi të
cilët kanë qenë aty permanent dhe edhe vetë ministri i Punëve të Jashtme
të Shqipërisë kanë bërë një punë të mirë dhe rezultatet do të shihen.

-- Nga 69 shtete që e kanë njohur Kosovën, për sa prej tyre ju e keni
meritën më të madhe?

Pacolli: Unë jam shumë i hendikepuar që të them kjo apo ajo. Së pari
69 shtete është sukses i Kosovës dhe meritë e krejt sakrificave të
popullit të Kosovës. Por besomëni se një numër i madh i këtyre shteteve
janë ato shtete ku unë fuqishëm kam lobuar, fuqishëm kam kontaktuar me
ta dhe ndoshta me më tepër se 17 shtete prej këtyre besoj se janë edhe
rezultat i lobimit tim. Pse e them këtë? E them se kam qenë i pari
kosovar që kam kontaktuar krerët e këtyre shteteve dhe kam mbetur i
fundit kosovar që kam kontaktuar krerët e këtyre shteteve dhe si
rezultat i kësaj ka pasuar njohja. Sido që ta trajtojnë të tjerët, unë
këto njohje i marr si sukses të Kosovës, dikush duhet të jetë iniciator,
normalisht në këtë rast kam qenë unë iniciator i kësaj dhe gjithmonë i
gatshëm për lobime të ardhshme dhe nga kushdo që është një rezultat
është rezultat për Kosovën.

-- A do të ketë ndonjë njohje të re tani?

Pacolli: Unë ju thash pak më parë se do të kemi njohje tash në
dhjetëditëshin e parë të muajit të ardhshëm. Njohje prej shteteve ku kam
lobuar. Ju e dini se unë kam qenë në Forumin Botëror Ekonomik në
Afrikë. Ai është Forumi i Davosit, unë kam qenë atje me krejt
kredencialet, ashtu siç ka qenë presidenti në Kuala Lumpur tani në një
forum më të vogël pak, por mua gjithmonë më kanë munguar telekamerat, më
ka munguar statusi që nuk e kam. T’u tregoj se unë kam pasur takime me
nëntë presidentë shtetesh atje dhe si vazhdimësi e këtyre takimeve pason
tani takimi edhe në Nicë.

-- A mos po i bëni presidentit konkurrencë në këtë mënyrë?

Pacolli: Jo unë nuk i bëj presidentit konkurrencë, por do të isha më i
lumtur që unë ta ndihmoja presidentin, për arsye se sot faktet tregojnë
se diplomatët kosovarë kanë një hendikep. Ata nuk munden në çdo moment
të bëjnë një veprim që unë mund ta bëjë në çdo moment, kur t’më bie
ndërmend, kur është nevoja dhe ata janë të kufizuar edhe për shkak të
burokracisë që kanë tani edhe për shkak të mundësive për udhëtim. E këtë
ata duhet ta kuptojnë, ta shfrytëzojnë këtë, sepse unë udhëtoj në
momentin që më bie ndërmend, në momentin që dua të veprojë diku nuk kam
kufizime dhe as limite. Kam pasaporta të huaja, kam mundësi të udhëtoj, e
kam mjetin e udhëtimit dhe ma ka dhënë Perëndia, edhe mundësi për të
udhëtuar kam.