KUKËS- Më pak se 24 orë ndajnë nga rihapja e tunelit të Kalimashit
ndërsa në zonë vazhdojnë punimet e fundit. Burime nga firma Bektel Enka
konfirmojnë se brenda tunelit ka përfunduar plotësisht asfaltimi dhe
lyerja, ndërkohë që vazhdon kompletimi i sistemit të ndriçimit, sigurisë
përmes kamerave dhe vendosja e sinjalistikës së duhur. Deri në momentin
e rihapjes së tunelit, hyrja e tij vijon të jetë ende e bllokuar,
ndërsa pas ceremonisë së hapjes qarkullimi i automjeteve do të vijojë
normalisht.

Të parët që mirëpresin hapjen e tunelit janë drejtuesit e
automjeteve, të cilët gjatë gjithë kësaj kohe kanë shfrytëzuar rrugën
sipër tij apo rrugën e vjetër nacionale.
Tuneli i Kalimashit, me gjatësi 5.5 kilometra, pjesë e autostradës
Durrës-Kukës u mbyll nëntorin e vitit të kaluar pas shembjeve në
brendësi të tij.
Shembjet bllokuan dhjetra metra gjatësi të tunelit duke e bërë atë
tërësisht të pakalueshëm. Rihapja e tunelit, thuajse një vit pas
inagurimit pritet të shtojë fluksin e qarkullimit , vecanërisht gjatë
sezonit veror.