E shtuna e 15 majit ka shuar të gjitha iluzionet e të kuqve të
kryeqytetit, ku pas përfundimit të sezonit 2009-2010, është vendosur që
Partizani edhe në edicionin e ri të jetë pjesë e kategorisë së parë. Një
vit më parë, të kuqtë zbritën për herë të dytë në historinë e tyre një
kategori më poshtë se elita, por verdikti i sezonit 2009-2010 ka
përcaktuar që Partizani për herë të parë në historinë e tij do të
zhvillojë dy kampionate pa ndërprerje në kategorinë e parë.
Për tifozët e kuq, 15 maj 2010 është dita më e errët në historinë e
klubit, pasi situata e krijuar vë në pikëpyetje të ardhmen e Partizanit.
Humbja 1-2 në javën e fundit me Skraparin nuk kapërdihet nga
mbështetësit, pasi ekipi nuk e përligji fanellën që mban veshur.
Fundi i takimit me Skraparin ka krijuar një gjendje amorfe në kampin e
kuq, pasi “de facto” Partizani quhet “i shkrirë”. Pasi kanë lënë fushën
e stadiumit të Krujës, lojtarët dhe stafi janë përshëndetur mes tyre,
por nuk është vendosur asgjë për të ardhmen e ekipit.
Trajneri Haxhiu, pas takimit, ka deklaruar se pas kësaj ndeshjeje me
Skraparin mbyllet sezoni i Partizanit, kështu që nuk do të ketë më
seanca stërvitore. Gjithsesi, është thënë se për çdo gjë lojtarët do të
lajmërohen me anë të telefonave.