Barrë që shtohet mbi supet e qeverisë dhe kryeministrit, e ka quajtur
lideri i PS-së, Edi Rama mos zgjidhjen e situatës politike në vend. Pas
vizitës te deputetët grevistë në spital, Rama ka deklaruar se "Gjendja e
grevistëve po rëndohet dhe cdo orë që kalon është një përgjegjësi e
rritur mbi supet e këtij pushteti që kokëfortësisht mban peng një
zgjidhje të arsyeshme për t'i hapur rrugë transparencës duke hapur
kutitë dhe gjithë dokumentacionin zgjedhor dhe duke pritur nga një
instancë e pavarur gjykimin mbi fletët e votimit".


Sipas tij, është një domosdoshmëri jetike që kjo zgjidhje të jepet dhe
që duke hapur rrugën e transparencës të clirohen zgjedhjet dhe gjykimi i
popullit për të zgjedhur qeverinë që do.


"Theksoj me forcë se interesi kombëtar, është që transparenca të bëhet.
Kjo bie ndesh me interesin e një grushti njerëzish, por këta nuk mund të
mbajnë në kurth demokracinë, shtetin e së drejtës dhe perspektivën e
vendit që po rrënohet ekonomikisht"- tha Rama.


Sipas Ramës, zgjidhja e arsyeshme dhe forca e arsyes janë sot më qartë
se kurrë zgjedhja jonë për të hapur një perspektivë të re.


"Arsyeja e forcës dhe zgjidhja e paarsyeshme që kërkohet të jepet janë
vetëm barrë që rritet mbi supet e vendit dhe njerëzve dhe përgjegjësia
shtohet në llogari të qeverisë dhe kryeministrit"- tha ai.