TIRANE – Lajmifundit – 13 maj 2010 – Drejtori i Policisë së Tiranës Tonin Vocaj i dërgoi sot një
letër kryetarit të Bashkisë Edi Rama në të cilën kërkon “zhbllokimin menjëherë” të bulevardin “Dëshmorët e Kombit” për të lejuar qarkullimin e automjeteve në këtë aks.
Në letrën e datës 13 maj 2010, ne numër protokolli 2364/27, me objekt: Situarën e krijuar në bulevardin “Dëshmorët e Kombit”, thuhet se:
“Në vijim të komunikimeve të mëparshme, ju rikujtojmë se ligji “Për tubimet” nuk lejon zhvillimin e tubimeve disa ditore. Në zbatim të nenin 5 të këtij ligji ju kemi kërkuar që të dërgoni pranë Policisë Tiranë, çdo ditë, njoftim më vete për secilin tubim që zhvillohet.
Mosdërgimi nga ana juaj e këtij njoftimi përbën vepër penale. Po kështu dëshirojmë t`ju sqarojmë se megjithë përpjekjet tona për menaxhimin e trafikut, bllokimi i bulevardit “Dëshmorët e Kombit”ka cënuar rëndë situatën e trafikut rrugor në qytetin e Tiranës.
Si pasojë e devijimit të trafikut shumë akse rrugore të Tiranës kanë pasur mbingarkesë.
Ditët e fundit është vërejtur se tubuesit grumbullohen në pika të ndryshme të qytetit të Tiranës dhe nga aty lëvizin të organizuar drejt bulevardit “Dëshmorët e Kombit”.
Këto veprime janë kryer pa asnjë njoftim paraprak çka ka vënë në vështirësi strukturat tona në menaxhimin e trafikut dhe ruajtjen e qetësisë publike.
Ju përsërisim se vënia e pengesave dhe ndalimi me çdo mjet e mënyrë i qarkullimit të mjeteve të transportit përbën vepër penale sipas nenit 293 të Kodit Penal.
Sa më sipër, ju rikërkojmë zhbllokimin e menjëhershëm të rrugës dhe krijimin e mundësive për normalizimin e trafikut rrugor në Bulevardin “Dëshmorët e Kombit"