Po forcohet bindja e shteteve të Bashkimit Europian se është e nevojshme
të ketë përgatitje për opinionin këshillëdhënës të Gjykatës
Ndërkombëtare të Drejtësisë lidhur me pavarësinë e Kosovës dhe për të
formuluar një qëndrim të përbashkët para vendimit të Gjykatës, kanë
thënë diplomatë në Bruksel për WazEuObserver.

“BE’ja duhet të jetë e gatshme për opinionin e GJND’së; Vendimi nuk
duhet të na gjejë të papërgatitur. Unë thellësisht besoj se publikimi i
opinionit të GJND’së është një mundësi për aksion të BE’së drejt
stabilizimit të rajonit”, ka thënë ministri i Jashtëm sllovak, Miroslav
Lajcak.

Kjo ide është forcuar javëve të fundit. Burime diplomatike thonë se
institucionet e BE’së dhe shtete anëtare pajtohen se BE’ja duhet të
diskutojë dhe formulojë me kohë një qëndrim të përbashkët për opinionin e
GJND’së, që pritet të publikohet gjatë pjesës së dytë të këtij viti.

Sllovakia është mes pesë shteteve të BE’së që nuk e kanë njohur Kosovën
dhe është nën presion nga partnerët euro-atlantikë që të rishqyrtojë
qëndrimin. Njëkohësisht, ndarja e Kosovës përgjatë kufijve etnikë do të
ishte skenari më i keq për Sllovakinë duke marrë parasysh problemet
etnike me pakicën hungareze.

Fillimisht, Lajcak dëshironte që çështja e Kosovës të vihet në agjendën e
ministrave të jashtëm të BE’së në maj, duke sinjalizuar se ai kishte
propozime të reja se si të tejkalohet bllokada dhe të hapet dialogu mes
Prishtinës dhe Beogradit.