Ministri i Jashtëm, Skënder Hyseni dhe homologu i tij bullgar, Nikolay
Mladenov, janë pajtuar gjatë një takimi në Prishtinë se e ardhmja e
Ballkanit Perëndimor është në BE.

Dy ministrat kanë theksuar se vendet e rajonit duhet të ndihmojnë njëra-
tjetrën në përpjekje për t’u integruar sa më parë në strukturat
euro-atlantike.

Mladenov ka shprehur gatishmërinë e vendit të tij për ta ndihmuar
Kosovën, në luftimin e krimit të organizuar dhe korrupsionit. Ai ka
shpalosur përvojat e shtetit bullgar për luftimin e këtyre dukurive
negative dhe ka ftuar Prishtinën të ndjekë këta hapa, duke bërë reforma
në gjyqësi dhe ndryshim në legjislacion, për ta dënuar korrupsionin.

“Është i dëmshëm, pa dyshim që po, fshehja e korrupsionit... Me
ministrin kemi diskutuar që kemi nevojë për koncentrimin më të madh të
forcave në luftën kundër krimit dhe korrupsionit. Mendoj që secili vetë
duhet të mundohet ta luftojë krimin, në mënyrë që njëherë e përgjithmonë
të hiqet reputacioni jo i mirë i ballkanasve”, ka thënë Mladenov,
transmeton KosovaPress.