Ministri i Punëve të Jashtme të Italisë, Franko Frattini i cili po qëndron sot zyrtarisht në Shqipëri, ka deklaruar se "shqiptarët do të mund të lëvizin lirshëm, pa viza, nga vjeshta e këtij viti".

Shefi i diplomacisë italiane tha se vendimi pritet që të merret më datë 2 qershor 2010 në konferecën e ministrave të Jashtëm të Bashkimit Evropian(BE).

Këto komente ministri i jashtëm italian Frattini i bëri gjatë një konference të përbashkët për media, me homologun e tij nga Shqipëria, Ilir Meta.

Shefi i diplomacisë italiane, theksoi se rruga e vendeve të Ballkanit Perëndimor është drejt Evropës, dhe se vendet e rajonit do të kenë përgjegjësi respektive në kuadër të integrimit.

"Shqipëria ka bërë shumë progres në kuadër të integrimit. Italia do të punojë fort që statusi i vendit kandidat për Shqipërinë të merret brenda këtij viti. Dua të theksoj se autoritetet shqiptare kanë shumë punë për të bërë", u shpreh Frattini.

"Objektivi ynë është që të përftojmë një mendim poziviv nga Komisioni Evropian që në fund të muajit Maj. Italia do të jetë mbrojtësi më i fortë i liberalizimit të vizave, por gjithsesi nevojitet edhe një vullnet i mirë i gjithë ministrave të Jashtëm të Bashkimit Evropian që do të japin vendimin formal më datë 2 qershor", tha ndër të tjera Frattini.