Kanë kaluar pak ditë nga ngjarja e rëndë në ndeshjen mes Shkumbinit dhe Besës, ku kryebashkiaku i Peqinit, Ilir Rrushi dhe zv.trajneri i Shkumbinit goditën trajnerin e Besës, Shpëtim Duro. Kjo ngjarje e turpshme u pasua me padinë penale, që ka bërë vetë trajneri Duro në komisariatin nr. 2 të Tiranës, ndërkohë që ende nuk ka pasur ndonje reagim nga strukturat qeveritare dhe ato të federatës. Shoqata e Trajnerëve të Futbollit, me kryetar Bejkush Birçen, ndihet krejtësisht e pafuqishme për të reaguar përballë fenomeneve të tilla. Ka bërë thjesht një deklaratë solidariteti dhe kaq. “Me thënë të drejtën, akoma nuk jemi mbledhur për të vepruar dhe për të dhënë një përgjigje përfundimtare. Kemi ardhur të bashkëpunojmë me organet e federatës, që t’i shohim këto probleme. Ne dimë vetëm që kjo çështje u është përcjellë organeve gjyqësore. Si shoqatë, nuk jemi të përgatitur për masa të tjera. Kjo është një dhunë që ka ndodhur jashtë fushe dhe nuk na takon ne, komunitetit të futbollit, por organeve të tjera.” Megjithatë, nuk ka munguar sensibilizimi i trajnerëve të tjerë të superligës, të cilët, edhe pse e konsiderojnë një ngjarje që sa vjen e bëhet më e zakonshme, kërkojnë njëzëri një reagim të ashpër kundrejt kujdo që prish lojën e bukur të futbollit.