Edi Rama ka zgjedhur të mos përfshihen në polemikat për sheshin Skënderbej. Projekti për rindërtimin e sheshit do të vazhdojë të implementohet ashtu siç është hartuar nga studioja belge, edhe pse qeveria e kundërshton. Ai tha se nuk dëshiron të hyjë në polemika të panevojshme me Berishën.


Kryetari i Bashkisë së Tiranës, inspektoi sot punimet dhe u shpreh se ndërtimi i sheshit duke marrë në konsideratë rëndësinë historike dhe duke vlerësuar aspektin tradicional do të ketë edhe elementët e rinj që sjellin sheshin e shekullit të ri.


Sipas tij, projekti për rikonstruktimin e sheshit është ambicioz dhe i plotë. Ai nuk do të bllokojë trafikun, pasi punimet do të kryhen me faza dhe qarkullimi i automjeteve nuk do të ndalohet pa u bërë funksional unaza rreth sheshit. Rama shtoi se pjesa më e vështirë e projektit është ajo e punimeve nëntokësore.


Ndërsa i pyetur nga gazetarët për apelin e kryeministrit për bashkëpunim duke marrë në konsideratë kërkesat e tij, Rama u shpreh se "nuk dua të hyj në asnjë polemikë. E kam thënë dhe e përsëris. Ky është një projekt madhështor, ambicioz, i ndërlikuar. Është një projekt shumë qëndror për kryeqytetin dhe për të gjithë qytetarët që jetojnë në Tiranë dhe jashtë saj dhe këtu duhet bashkërendimi i të gjitha forcave, si dhe energjive pozitive. Çdo energji negative, e destzruktive nuk është në të mirën e kësaj pune që unë e konsideroj në të mirën e përbashkët".