Ambasadori britanik në Beograd Stiven Uordsuorth ka deklaruar se nga Serbia nuk kërkohet që të njohë pavarësinë e Kosovës, por që Beogradi duhet patjetër të vendosë ndonjë model bashkëpunimi me Prishtinën. Ai ka theksuar se BE disa herë ka përsëritur se nuk kërkon nga Serbia të njohë Kosovën dhe se ky qëndrim mbetet. Mirëpo, ka shtuar ai, realiteti me të cilin Serbia duhet të përballet është se 22 vende anëtare të BE-së e kanë njohur pavarësinë e Kosovës dhe se kjo nuk do të ndryshojë, andaj nevojitet që të gjendet mënyra që ky fakt të mos bëhet pengesë në rrugën e Serbisë drejt BE-së, ka thënë Uordsuorth për B92. Ndërkaq duke folur për veriun e Kosovës, ambasadori britanik ka thënë se ende nuk është vendosur sesi do të zgjidhet situata në atë zonë dhe në katër komuna serbe, por në lidhje me këtë çështje, Piter Fejt ka bërë një propozim. Ajo që nevojitet është që të vendoset sistemi në të cilin qytetarët e tërë Kosovës do të vendosin marrëdhënie çfarë dëshirojnë, tha Uordsuorth.