Fernando Torres ka pohuar se do të mendohet për të ardhmen e tij te Liverpuli nëse klubi i tij nuk blen lojtarët që nevojiten për ta kthyer këtë skuadër në pretendente për titullin në Premier Ligë. Liverpuli është aktualisht në vend të gjashtë në renditje dhe ka luajtur më shumë ndeshje se rivalët e tjerë për vendin e katërt, që siguron praninë në Champions Ligë.

Duke qenë se Liverpuli ka dështuar në kompeticionet vendase dhe madje ka humbur edhe ndeshjen e parë për 1/16-at e Ligës Europa kundër Lilës të enjten, ky sezon mund të rezultojë një katastrofë për të. Megjithatë, më shumë se objektivi i vendit të katërt këtë sezon, Torres mendon se gjëja më e rëndësishme për Liverpulin është që të jetë shumë i suksesshëm në merkaton e verës pas mbylljes së këtij sezoni. Kur është pyetur nga gazeta e përditshme spanjolle “AS” nëse kishte ndër mend të largohej nga Liverpuli nëse ata nuk arrijnë të kualifikohen për në Ligën e Kampionëve, ai ka thënë: “Eshtë shumë shpejt për të folur. Unë mendoj se do të jemi në vend të katërt, por për mua kualifikimi në Ligën e Kampionëve nuk është aq i rëndësishëm. Gjëja që ka me të vërtetë rëndësi është që klubi të përpiqet të blejë lojtarë të rëndësishëm, të cilët do të përmirësojnë kualitetin e skuadrës.

Ne kemi nevojë për katër ose pesë lojtarë klasi që të jemi kompetitivë, më të mirë se këta që kemi këtu, pasi vetëm kështu do të jemi të detyruar të japim gjithçka për të mbajtur vendet tona në formacion. Nëse nuk kemi përforcime sezonin që vjen, do të jemi sërish duke luftuar për vendin e katërt. Unë dua të luftoj vitin që vjen për titullin kampion në Premier Ligë, që të fitojmë Ligën e Kampionëve ose Ligën Europa, por për këtë duhet të bëjmë disa blerje më parë.”

Duke iu kthyer pyetjes së parë, në lidhje me të ardhmen e tij, Torres ka thënë: “Eshtë shumë herët për të folur pasi duhen marrë në konsideratë shumë gjëra dhe rrethana. Unë kam edhe tre vite të tjerë kontratë me Liverpulin përveç këtij sezoni. Jam larguar nga shtëpia ime dhe është e qartë se jam borxhli ndaj Liverpulit për shumë gjëra. Jam i lumtur këtu. Tifozët më kanë trajtuar si të isha nga Liverpuli, por unë do të mendohem për të ardhmen time.

Shpresoj të jem këtu sepse mendoj se tifozët e meritojnë që të fitojmë. Le të lëmë për pak çaste egon time. Ky klub e meriton të kthehet te trofetë, por dihet që tani jemi goxha larg. Tifozët janë të shqetësuar për lojtarët që largohen. Eshtë problem kur fillon të kesh frikë se largohen lojtarët sepse kuptohet që klubi nuk po përparon, por unë nuk mendoj se kjo situatë do të jetë edhe kështu. Që prej ardhjes së drejtorit Kristian Purslou, Liverpuli ka pasur një shtysë të mirë përpara, arritëm një marrëveshje të madhe sponsorizimi e ngjashme me atë të Real Madridit. Pra, gjërat besoj se do të lëvizin përpara.”