Batërdi ekonomike e ka cilësuar kreu i PS-së, Edi Rama situatën që po kalon vendi, duke bërë përgjegjës për këtë krizë kryeministrin Sali Berisha.


Gjatë një bashkëbisedimi me gazetarët, Rama e ka vënë theksin në krizën ekonomike, duke përsëritur faktin që arka e shtetit ka mbetur bosh, ndërkohë që janë shqiptarët ata që vuajnë pasojat e keqqeverisjes.


"Arka e shtetit është bosh. Situata ekonomike po vështirësohet së tepërmi, jo vetëm për pensionistët, të cilët po i japin shtetit më shumë se sa shteti u dha atyre, por edhe për familjet e punësuara",ka thënë Rama gjatë fjalës së tij.


Rama ka bërë një analizë të faturave tejet të fryra që u duhet të paguajnë familjet shqiptare, gjendja ekonomike e të cilave sa vjen e keqësohet.

"Me këtë batërdi ekonomike ku zhytet vëndi përditë, zoti Berisha vazhdon të pretendojë tunele të reja dhe rritje rrogash e pensioniesh" - tha Rama, duke iu referuar premtimeve të fundit të Berishës për infrastrukturë moderne dhe rritje pagash e pensionesh.