Në ambientet e “Sky Toëer” dje është organizuar një konferencë për shtyp, ku janë prezantuar strukturat e reja të FK “Partizanit”. Administratori i përgjithshëm i Partizanit, Paro Laçi, me autoritetin e përfaqësuesit ligjor, ka prezantuar para medias strukturat e klubit: Bejkush Birçe president nderi, Sulejman Starova drejtor sportiv. Bujar Labinoti shef klubi, Ardjan Grabova menaxher i klubit, Dasada Karaiskaj zëdhënëse për shtyp. Në këtë paraqitje peshën më të madhe e ka mbajtur administratori Laçi, i cili ka deklaruar se Albert Xhani nuk konsiderohet më president i Partizanit, pasi duke qenë përfaqësues ligjor i shoqërisë, i lind e drejta të bëjë emërimet. Sipas Laçit, Xhani mbetet aksionar, së bashku me Lulëzim Sallakun, pasi nuk është mbledhur shoqëria për të bërë ndryshimet që pretendohen. Njëkohësisht është bërë e ditur se Partizani tani ka llogari bankare dhe do t’i jepet fund punës në të zezë dhe kontratave pa vlerë. Më pas, fjalën e kanë marrë edhe përfaqësuesit e panelit, Birçe, Starova, Labinoti, si dhe trajneri Bejzade dhe kapiteni Pinari. Kryetari i shoqatës së tifozëve, Agim Gjonça, ka konfirmuar mbështetjen për nismat e marra së fundi në ekipin e zemrës. Ja një pjesë nga ligjërata e administratorit Paro Laçi në konferencën e djeshme: “Jemi këtu që të paraqesim një ekip modern, një ekip që në të ardhmen do ta çojmë aty ku e meriton, në fakt aty ku ka qenë, sepse Partizani nuk e meriton të jetë këtu. Një klub nuk mund të drejtohet i vetëm, gjithsecili duhet të bëjë detyrat e veta. Unë jam përfaqësuesi ligjor i Partizanit. Partizani nuk ka president siç pretendon dikush. Shoqëritë aksionare kanë një përfaqësues ligjor dhe unë për tre vjet jam i tillë. Ky përfaqësues jep llogari përpara asamblesë së aksionarëve dhe unë e bëj këtë. Te Partizani është vepruar me “unin” dhe mua kjo nuk më shkon për shtat. I kam bezdi fjalët “unë, unë, unë…”, përgjegjësitë duhen ndarë. Ne jemi që t’i kërkojmë llogari njëri-tjetrit. Bert Xhani duhet të përmbushë investimin e tij, sepse nëse ka 50%, mund t’i bëhen 40% apo dhe në rastin nëse ka 70% kjo s’do të thotë asgjë. Nëse ai nuk përmbush investimin, gjërat janë me ligj të thjeshta fare. Partizani ka këtë strukturë drejtuese dhe këtë nuk e lëviz askush. Çdo aksionar, sado përqindje të ketë, duhet në radhë të parë t’i përmbushë ato. Heqja e një administratori përcaktohet me ligj e me status dhe duhet të ketë motive për se duhet të hiqet. Nëse do fillohet me sisteme bllokuese, ka rrugë ligjore për ta zgjidhur këtë problem.”