Ka startuar java e 23-të e superligës, që konsiston edhe me fillimin e fazës së tretë të kampionatit, me një ndeshje, ndërsa tjetra, e planifikuar për të shtunën e 6 marsit 2010, është shtyrë. Fjala është për sfidën e Peqinit, mes Shkumbinit dhe Vllaznisë, e cila nuk mund të luhej, si rezultat i kushteve tërësisht të papërshtatshme për futboll. Fusha e Peqinit ishte kthyer në një gjol, ku uji dhe balta dominonin cdo gjë. Për pasojë, drejtuesit e të dyja skuadrave, por edhe përfaqësuesit e FSHF-së, kanë vendosur të mos luhej të shtunën. Nga ana e saj, vetë FSHF-ja ka urdhëruar që brenda 24 orëve të luhet ky takim, prandaj do të tentohet edhe të dielën, që sfida Shkumbini-Vllaznia të zhvillohet. Ndeshja tjetër e së shtunës, e luajtur në “Selman Stermasi“, mes Tiranës dhe Kastriotit, ka përfunduar me fitoren e krutanëve, me rezultatin 1-0.