Beograd, 25 shkurt - Shefi i diplomacisë serbe Vuk Jeremiq ka deklaruar se nga Spanja ka marrë "mbështetje të fortë" që Beogradi të vazhdojë me "qëndrimin parimor" kur bëhet fjalë për politikën e tij ndaj Kosovës dhe për pjesëmarrjen në takimet rajonale. "Ne nuk do të pengojmë pjesëmarrjen e Kosovës në këto takime dhe nuk do të refuzojmë që në to të marrim pjesë nëse respektohen rregullat e përcaktuara për mënyrën në të cilën Kosova mund të përfaqësohet", ka thënë Jeremiq për gazetën "Blic". Autoritetet e Serbisë insistojnë që Kosova në takimet ndërkombëtare të përfaqësohet si "UNMIK- Kosovo". Zyra e Presidentit të Serbisë Boris Tadiq dje ka thënë se Beogradi zyrtar nuk ka asgjë kundër pjesëmarrjes së përfaqësuesve të Prishtinës në takimet ndërkombëtare, nëse ata janë të prezentuar me shenjën "UNMIK- Kosovo". Sipas shtypit serb, Tadiq në këtë mënyrë ka paralajmëruar një takim të mundshëm të Presidentit të Serbsisë dhe Kosovës në samitin e liderëve të Ballkanit Perndimor në muajin mars në Slloveni. Sipas mediave serbe, Madridi i ka garantuar Beogradit se nuk do të ketë takime zyrtare që i organizon BE-ja në të cilat nuk do të respektohen "rregullat e përcaktuara të Beogradit" para dhjetë vjetësh. Cilat janë tri kërkesat e Serbisë? Në takime të vehen tabelat me emrat dhe mbiemrat e të gjithë pjesëmarrësve, pa funksione zyrtare shtetërore (kjo i përgjigjet edhe Greqisë dhe Maqedonisë për shkak të konfliktit rreth emrit). Në takime duhet të jetë peerzentë përfaqësuesi i UNMIK-ut. Zyrtari nga Kosova nuk mund të flasë derisa nuk paraqitet përfaqësuesi i UNMIK-ut.