Nga Ministria e Turizmit, Kulturës, Rinisë dhe Sporteve është kërkuar ngritja e një grupi pune për amendime në ligjin aktual të Turizmit,të cilat pasi të diskutohen në grupet e specialistëve të turizmit, grupet e interesit,nga drejtoria juridike e MTKRS etj., të kalojnë për miratim në strukturat përkatëse. Në krye të këtij grupi është Zv/ Ministri Lesi i cili kërkoi që të vendoset në ligj mënyra e klasifikimit të hoteleve dhe restoranteve turistike ( vendosja e yjeve), pasi deri më tani është në mënyrë vullnetare në dorën e pronarëve të tyre që t'i vendosin yjet sipas dëshirës,gjë të cilën zv/ministri Lesi e quajti absurde.

Gjithashtu zv/ministri kërkoi nga grupi i punës që të shikojë mënyrën ligjore se si mund të implementohet në ligjin aktual edhe detyrimi për t'u siguruar patjetër në kompanitë e sigurimeve të gjithë hotelet e restorantet,madje kjo të jetë pjesë e rregullave të klasifikimit të tyre nga Ministria e Turizmit.Ai i sugjeroi grupit të punës që të gjendet mënyra për të amenduar në ligj edhe futjen e një anëtari të Zyrave të Shërbimit Turistik në qarqet e vendit në KRT-të e Komunave dhe Bashkive,pasi ka nevojë emergjente të ndalohet miratimi i ndërtesave shumëkatëshe në zonat bregdetare pa studime të mirëfillta.