Austriakja Andrea Fischbacher është kampione e re olimpike në supersllallom të madh (Super-G), derisa medalja e argjendtë i ka takuar Tina Mazes nga Sllovenia, kurse e bronzta i ka takuar amerikanes Lindsey Vonn. Fischbacher, e cila në karrierën e saj e ka shënuar vetëm një fitore në kuadër të Kupës së Botës dhe atë para dy viteve, deri te triumfi në Lojërat Olimpike Dimërore në Vancouver ka arritur me kohën prej 1:20.14 minuta. Austriakja vendit të saj ia ka sjell medaljen e parë të artë në skitë alpine në Lojërat e 21-ta Dimërore. “Ka qenë një çmenduri e vërtetë. Shtegu ka qenë mahnitës, është dashur vetëm të jap maksimumin dhe të arrijë deri te fitorja”, ka thënë austriakja 24 vjeçare. E kënaqur me paraqitjen e saj ka qenë edhe sllovenia Tina Maze, për të cilën kjo është medalja e parë olimpike në disiplinat alpine të fituar për Slloveninë që nga viti 1994. “Në start të garës kam qenë nervoze. E kam parë se skitaret tjera kanë bërë disa gabime dhe për këtë arsye kam pasur frikë se mos do të më ndodh edhe mua e njëjta gjë”, është shprehur Maze. Ndonëse para fillimit të Lojërave nuk ka qenë e sigurt pjesëmarrja e saj në Vancouver, Lindsey Vonn tashmë ka fituar dy medalje në këtë Olimpiadë. Megjithatë amerikania nuk ka qenë aspak e kënaqur me medaljen e bronztë. “Nuk kam skijuar në mënyrë agresive, pra aq sa duhet andaj mendoj se për këtë arsye edhe e kam humbur garën”, ka nënvizuar Vonn. Gara e ardhshme në skitë alpine në konkurrencën e femrave është caktuar për të martën, kur në program është gara e sllallomit të madh.

Rezultatet

1. Andrea Fischbacher (Aus) 1:20.14

2. Tina Maze (Sllov) 1:20.63

3. Lindsey Vonn (SHBA) 1:20.88

4. Johanna Schnarf (Ita) 1:20.99

5. Elisabeth Gorgl (Aus) 1:21.14

Medaljet

1. SHBA 6 7 10 23

2. Norvegjia 5 3 3 11

3. Gjermania 4 6 4 14

4. Koreja e Jugut 4 4 1 9

5. Kanada 4 3 1 8

6. Zvicra 4 0 1 5

7. Suedia 3 1 2 6

8. Kina 3 1 1 5

9. Austria 2 2 3 7

10. Franca 2 1 4 7