Dilema për procesin më të diskutueshëm

Prishtinë, 18 shkurt - Gjykata Kushtetuese e Republikës së Kosovës ende nuk ka marrë vendim për zgjedhjet në Gjakovë, pavarësisht paralajmërimeve, që çështja të vendosej në javën që shkoi.

Ankesa është parashtruar nga kandidatja për kryetar të komunës së Gjakovës, Mimoza Kusari-Lila, e cila kohë më parë ka parashtruar kërkesën për mbrojtjen e kushtetutshmërisë dhe ligjshmërisë kundër vendimit të certifikimit të zgjedhjeve nga ana e KQZ-së për kryetar të komunës së Gjakovës të datës 4 dhjetor 2009.

Në seancën dëgjimore të 9 shkurtit, trupi gjykues në përbërje të pesë anëtarëve, i kryesuar nga kryetari Enver Hasani, i kanë dëgjuar argumentet e të dyja palëve, të nënpresidentës së AKR-së, Mimoza Kusari Lila si parashtruese e kërkesës dhe kryetares së KQZ-së, Nesrin Lushta si palë kundërshtare, të cilat i kanë paraqitur argumentet e tyre për vendimin e certifikimit të zgjedhjeve në komunën e Gjakovës.

Edhe pse ishte paraparë, që brenda asaj javë të merret vendim lidhur me këtë kërkesë, Gjykata Kushtetuese e Kosovës, ende nuk e ka marrë vendimin lidhur me këtë kërkesë. Vigan Qorrolli, zëdhënës i Gjykatës Kushtetuese, tha se kjo gjykatë ende nuk ka marrë asnjë vendim, deri më tani lidhur me kërkesën e ish kandidates për kryetare të Gjakovës, Mimoza Kusari Lila, për mbrojtjen e kushtetutshmërisë dhe ligjshmërisë, kundër vendimit të certifikimit të zgjedhjeve nga ana e KQZ-së për kryetar të komunës së Gjakovës, dhe se sipas tij ky vendim pritët të merret shumë shpejt.

“Unë nuk mund t’ju garantoj se kur do të merret ky vendim, pasi që kjo i takon kolegjit dhe gjykatës në përgjithësi, ajo çka mund të ju them është se deri më sot ende nuk është marrë asnjë vendim. Kjo është çështje e agjendës së gjykatës ashtu siç e ka paraparë, por pritet shumë shpejtë të merret një vendim për këtë”, tha zëdhënësi Qorrolli.

Ndërsa, lidhur me atë se cili do të jetë vendimi i Gjykatës Kushtetuese, pas seancës dëgjimore të 9 shkurtit, kryetarja e KQZ-së, Nesrin Lushta nuk dëshiron ta paragjykojë. Nga ana tjetër, Mimoza Kusari-Lila, e cila edhe ka ngritur kërkesën në Gjykatën Kushtetuese për shkeljet nga KQZ-ja, i ka bërë duke certifikuar zgjedhjet pa u shqyrtuar ankesat e subjektit të saj politik, pati thënë se kjo ishte shansi i fundit që procesi të kurorëzohet me kurorën e demokracisë së re, sepse sipas saj ajo çka ka ndodhur me procesin zgjedhor sidomos në komunën e Gjakovës, ishte shkelje flagrante e demokracisë.

Zgjedhjet në Gjakovë janë fituar nga AAK-ja, kryetari Pal Lekaj, i cili po qeverisë në mandatin e tij të dytë, nëse Gjykata Kushtetuese nuk vendos ndryshe.

Kjo është çështja e parë që ka shkuar në Gjykatën Kushtetuese për zgjedhjet në Kosovë, ndërsa vetë Gjykata ka filluar funksionimin në vjeshtë, dhe ende nuk është konstituar në tërësi.