Amerikania Lindsey Vonn e ka rrëmbyer medaljen e artë me kohën prej 1:44.19 në disiplinën e lëshimit në Lojërat Olimpike Dimërore të Vancouverit. Favoritja kryesore e Olimpiadës ka arritur deri te medalja e parë e artë për 53 të qindtat më shpejtë se skiatorja tjetër nga SHBA, Julia Mancuso, derisa medalja e bronztë i ka takuar austriakes Elisabeth Goergl, e cila mbeti prapa fitueses për 1 sekondë e 46 të qindtat. Me këtë fitore Vonn është bërë amerikania e parë që e ka fituar medaljen e artë në disiplinën e lëshimit në Lojërat Olimpike Dimërore.

“Kjo është e tëra çka kam dashur dhe ajo për të cilën kam shpresuar shumë”, është shprehur Vonn me lot në sy pas garës. “Është e pabesueshme. Ky moment është njëri nga më të mirët në jetën time. Të arrish në fund të shtegut dhe të shohësh emrin tim dhe të Julias lart është diçka fantastike”, ka thënë Vonn, e cila ka shtuar: “E kam ditur çka duhet të bëjë dhe e kam bërë. E kam ditur se duhet të lëviz me shpejtësi dhe të sulmoj. Falë kësaj edhe ia dola. Nuk di çka të them më shumë, përveç se kjo është e tëra çka kam dashur më së shumti në jetë”, ka përfunduar Vonn.