Sot, Këshilli kundër procesit gjyqësor ndaj Albin Kurtit, mbajti një konferencë për media ku është njoftuar për fillimin e peticionit në nivel të Kosovës me anë të të cilit kërkohet: 1. Mbyllja e procesit gjyqësor ndaj Albin Kurtit, dhe 2. Hapja e hetimeve të pavarura për vrasjet e 10 Shkurtit 2007. Në këtë konferencë për media, po ashtu është prezentuar edhe deklarata e këtij Këshilli lidhur me këtë rast, sikurse edhe rritja e numrit të organizatave që i janë bashkuar këtij Këshilli brenda dy ditëve të ekzistencës së tij. Numri i organizatave mbështetëse ka arritur në 40, dhe përfshin organizata nga të gjitha rajonet e Kosovës. Nënshkrimi i peticionit do të fillojë nesër (të Hënën) në orën 10:00, fillimisht në Prishtinë (në Sheshin “Nëna Terezë” dhe para Pallatit të Rinisë), për të vazhduar pastaj edhe në gjithë territorin e Kosovës.

_______________________________

Më 11 shkurt 2010 u krijua Këshilli Kundër Procesit Gjyqësor ndaj Albin Kurtit. Ky Këshill përbëhet nga një numër organizatash dhe aktivistësh të shoqërisë civile të cilët janë të shqetësuar për rihapjen e procesit gjyqësor ndaj Albin Kurtit dhe për mungesën e hetimit për vrasjen e dy demonstruesve më 10 shkurt 2007.

Ky Këshill lëshon këtë:

Deklaratë për Opinionin Publik

Më 15 shkurt 2010 EULEX-i (Misioni Evropian për Sundimin e Ligjit në Kosovë) do ta rifillojë gjyqin kundër Albin Kurtit nga Lëvizja VETËVENDOSJE! Kurti akuzohet për organizimin e një turme që ka kryer vepër penale, për drejtimin dhe pjesëmarrjen në një grup që ka penguar personat zyrtarë në kryerjen e detyrave të tyre zyrtare, si dhe për thirrje në rezistencë me forcë ose me kërcënim të rëndë më 10 shkurt 2007. Atë ditë Lëvizja VETËVENDOSJE! ka mbajtur një demonstratë paqësore në Prishtinë, por ndaj së cilës është ndërhyrë dhunshëm nga policia e UNMIK-ut (Misioni i Kombeve të Bashkuara në Kosovë). Si pasojë dy protestues paqësorë u vranë nga policia e UNMIK-ut dhe më shumë se 80 të tjerë u plagosën dhe lënduan.

Në vend që t’i ndjekë ata që ishin përgjegjës, UNMIK-u mbajti Albin Kurtin në paraburgim për njëmbëdhjetë muaj dhe inicoi kundër tij një gjyq që është dënuar nga organizatat e të drejtave të njeriut në gjithë botën për shkeljet e tij të shumta. Gjyqi u pezullua në shkurt të 2008-së kur avokatët e Kosovës e mbështetën thirrjen e Albin Kurtit për të mos e mbrojtur dhe u distancuan nga ky procesi gjyqësor.

Padia kundër Albin Kurtit, nga shumë organizata vendore e ndërkombëtare u cilësua si politikisht absurde, dhe ligjërisht e pabazë. Si shembull, në dhjetor të vitit 2007 Amnesty International me korrektësi e përshkroi rastin si "politikisht të motivuar".

EULEX-i pohon të jetë një mision i sundimit të ligjit dhe zbatues i drejtësisë në Kosovë, por duke e rihapur këtë rast ai bën një dështim flagrant në fushën e drejtësisë dhe të drejtave. Bazuar në shkeljet e shumta në këtë rast, në bazën e paqenë ligjore, por edhe në objektivat politike prapa tij, EULEX-i ka mundur me lehtësi ta mbyllë këtë rast.

Duke pasur parasysh këto që u thanë më lart, kërkojmë që:

- Të mbyllet procesi gjyqësor kundër Albin Kurtit sepse e dëmton demokracinë dhe të drejtat e njeriut në Kosovë;

- Të fillohet një proces i pavarur hetimi (qoftë edhe ndërkombëtar) për ngjarjet e 10 shkurtit 2007 në mënyrë që të zbulohet përgjegjësia penale për vrasjen e Arben Xheladinit dhe të Mon Balajt, si dhe për plagosjen dhe lëndimin e 80-të personave të tjerë;

- Institucionet e Kosovës, Kryetari, Qeveria dhe posaçërisht Kuvendi i Republikës së Kosovës, si dhe Avokati i Popullit të bëjnë presionin e duhur ndaj misioneve ndërkombëtare në Kosovë për mbylljen e këtij procesi gjyqësor si dhe të iniciojnë procedurat për fillimin e hetimit të vrasjeve të 10 shkurtit të vitit 2007.

- Këshilli Evropian, Parlamenti Evropian, Këshilli i Evropës, OSBE-ja, Komisariati i Lartë i OKB-së për të Drejta të Njeriut si dhe nga organizatat ndërkombëtare jo-qeveritare që merren me mbrojtjen e të drejtave të njeriut të ndikojnë që ky proces të mbyllet, dhe njëkohësisht të bëjnë presionin e duhur që të fillojnë hetimet për vrasjet e protestuesve më 10 shkurt 2007.

Në këtë kontekst nuk duhet të keqpërdoret as nga UNMIK-u, as nga EULEX-i pamundësia e qytetarëve të Kosovës që drejtësinë, si mjet i fundit juridik, ta kërkojnë në Gjykatën Evropiane për të Drejtat e Njeriut në Strasburg apo në Komitetin për të Drejtat të Njeriut të OKB-së.

Për aktivitetet e ardhshme të këtij Këshilli që ka për synim sensibilizimin e opinionit publik për të bërë presion që ky proces gjyqësor të mbyllet, do të njoftoheni me kohë.

Organizatat dhe individët të cilat deri më tani i janë bashkëngjitur këtij Këshilli dhe kësaj deklarate janë:

Rrjeti i Grave të Kosovës, Qendra për të Drejtat e Njeriut e Universitetit të Prishtinës, Çohu, Lëvizja Fol, Instituti i Prishtinës për Studime Politike (PIPS), Forumi për Iniciativë Demokratike (FID), Alter Habitus, Shoqata e ish të Përndjekurve Politikë, Emancipimi Civil Ma Ndryshe, Fondacioni për Iniciativë Demokratike (FDI), Mileniumi i Ri, Syri i Vizionit, Shoqata Kosovare për të Drejta të Njeriut dhe të Fëmijëve (KAHCR), Qendra për Trajnime dhe Studime Gjinore (QTSGJ), Qendra për Politika dhe Avokim, Qendra Kosovare për Bashkëpunim Ndërkombëtar (KCIC), Iniciativa për Progres (INPO), OJQ Prosperitet, KVRL, KPAM, Vizioni i Ardhmerisë, KVRL Prizren, Vajzat Sot, YC Fushe Kosove, Arnika, Rrjeti Rinor, OJQ Zana, KPA Dragash, Qendra Rinore, Këshilli Rinor i Rahovecit, Qendra Rinore – Viti, Liria, Syri i Rinisë, Rrejti i OJQ-ve të Shtërpcës, Hareja, Ekovizioni. Mekuli Press, KADC (Kosovo Advocacy and Development Centre) Qendra Kosovare për Avokim dhe Zhvillim, Violeta – Barileve, Rrjeti i Gruas Ajo, Handikos - Dega Prizren.