Disa nga pjesëmarrësit e Lojërave Olimpike Dimërore në Vancouver dhe trajnerët e tyre kanë shprehur pakënaqësinë me banimin në Fshatin Olimpik. Një gjë të tillë e kanë bërë të ditur mediat gjermane. Një nga ankesat që i është drejtuar organizatorëve ka të bëjë me muret e dhomave të cilët janë shumë të hollë dhe sportistët nuk po mund të flenë si duhet. Madje trajneri gjerman i kërcimeve në ski Werner Schuster e ka krahasuar Fshatin Olimpik me kampin për refugjatë. “Akomodimi është i dobët. Pesë apo gjashtë dhoma e ndajnë një banjë, kurse muret janë shumë të hollë, mu sikur perde”, ka thënë Schuster. Përveç mureve sportistët janë ankuar edhe për hapësirën të cilën e kanë në dispozicion pasi që nuk kanë as ku t’i thajnë rrobat e tyre. Skuadra gjermane ka blerë disa nxehëse në mënyrë që të thajnë rrobat e tyre të cilat shumë shpejt lagen për shkak të sasisë së madhe të djersës. Në anën tjetër trajnerëve ju pengon edhe fakti se janë të vendosur larg nga sportistët e tyre, kurse gjithashtu nuk ju pëlqen që duhet të ushqehen nga pjatat e plastikës. Përkundër të gjitha këtyre ankesave duket se shumica e banorëve të Fshatit Olimpik tashmë janë mësuar me këto kushte dhe sipas fjalëve të trajnerit gjerman Schuster, ka edhe sportistë që janë mësuar të përshtaten me kushte të ndryshme.