Asociacioni i Komunave të Kosovës ka reaguar përmes një deklaratë lidhur me formën e kompensimit për anëtarët e Kuvendeve Komunal dhe në kundërshtim me Udhëzimin Administrativ nr.16/2008, e nënshkruar nga Kryeministri i Republikës së Kosovës, z.Hashim Thaçi e cila përcakton pagat e stafit politik në Komuna. Ky reagim i Asociacionit të Komunave të Kosovës i është dërguar Presidentit, Kryeministrit, Kryeparlamentarit, Ministrit të MAPL-së dhe Ministrit të MAP-it. Në këtë reagim thuhet:

“Ministria e Administratës Publike (MAP) gjegjësisht Departamenti i Administrimit të Shërbimit Civil- Divizioni i Sistemit të pagave, ka filluar të zbatoj Udhëzimin Administrativ nr.3, dt.27.4.2004, për pagat e nëpunësve të shërbimit civil të Kosovës nga buxheti i Konsoliduar i Kosovës të angazhuar më shumë se në një vend pune për anëtarët e rinj të Kuvendeve të Komunave të Kosovës.

Ky Udhëzim Administrativ në shumicën e rasteve nuk është zbatuar për anëtarët e KK-ve gjatë mandatit të kaluar.

Çështja e pagesës së anëtarëve të Kuvendit të Komunës rregullohet me Udhëzimin Administrativ nr.16/2008, e nënshkruar nga Kryeministri i Republikës së Kosovës, z.Hashim Thaçi e cila përcakton pagat e stafit politik në Komuna. Udhëzimi në fjalë në nenin 1, e përcakton pagesën e anëtarëve të Kuvendeve të Komunës si kompensim (e jo si pagë), ndërsa lartësinë e kompensimit e ka përcaktuar në nenin 8 .

Në krahasim të këtyre dy Udhëzimeve Administrative, shihet qartë se Udhëzimi Administrativ nr.4 dt.27.4.2004, nuk mund të gjejë zbatim, për pagesën e anëtarëve të Kuvendeve të Komunës pasi që Udhëzimi në fjalë rregullon pagat e shërbyesve civil, ndërsa çështjen e pagesës së stafit politik në këtë rast Anëtarëve të Kuvendit të Komunës , shumë qartë e rregullon Udhëzimi Administrativ 16/2008. Gjithashtu, nga praktikat e deritanishme në Republikën me hyrjen në fuqi të UA 16/2008, shfuqizohet UA nr.3 i dt. 27 Prill 2004. Besojmë thellë që kjo do të ndodhë edhe në këtë rast

Për këtë arsye, Asociacioni i Komunave të Kosovës reagon ndaj zbatimit të gabueshëm sepse, ky Udhëzim nuk rregullon pagesën e anëtarëve të Kuvendit të Komunës, por rregullon pagesën e shërbyesve civil,sepse anëtarët e Kuvendit të Komunës, kanë mandate, janë të zgjedhur me votën e popullit, nuk janë shërbyes civil, por konsiderohen staf politik në Kuvend të Komunës.

Kërkojmë nga Ju, që Ministria e Administratës Publike ta ndërpresë zbatimin e Udhëzimit Administrativ nr.4 dt.27.4.2004, dhe të zbatoj vetëm Udhëzimin Administrativ 16/2008 ndaj të gjithë anëtarëve të Kuvendeve të Komunave të Kosovës të cilët punojnë edhe në institucione tjera, por jo në pozita udhëheqëse (drejtor) dhe mos të dëmtohen materialisht anëtarët e Kuvendeve të Komunës, nga të cilët po kërkojnë nënshkrimin e deklaratave për pagë primare dhe sekondare” - thuhet në reagimin e Asociacionit të Komunave të Kosovës nënshkruar nga z.Sazan Ibrahimi - Drejtori Ekzekutiv i AKK-së.