Nga ky projekt përfitojnë 14 qendra urgjence në spitalet rajonale të vendit e konkretisht në qytetet Lezhë, Kukës, Dibër, Durrës, Elbasan, Fier, Berat, Vlorë, Gjirokastër, Korçë, spitalet e qyteteve Lushnjë dhe Sarandë si dhe qendrat e urgjencës në Shërbimin e Pediatrisë në QSUT dhe Urgjencën e Tiranës

Është nënshkruar marrëveshja ndërmjet Qeverisë së Shqipërisë dhe Agjencisë Japoneze për Bashkëpunim Ndërkombëtar (JICA), për projektin “Përmirësimi i pajisjeve mjekësore të qendrave rajonale të urgjencës”.Për palën shqiptare marrëveshja u nënshkrua nga Ministri i Shëndetësisë,Petrit Vasili, ndërsa për palën japoneze, nga Përfaqësuesi Rezident i Zyrës Ballkanike të JICA,Saturo Kurosawa.“ Kemi konkretizuar një punë të filluar prej kohësh. Jemi duke vënë një tullë në themelin e strategjisë së shëndetit publik. Projekti do të shtrihet në 14 qendra urgjence dhe do të implementohet në harkun kohor të 12 muajve” theksoi ministri Vasili. Ky financim kap shifrën 718 milion Yen japonez, (5.5 milion euro) ndërsa pala shqiptare do të mbulojë kostot lokale të këtij projekti.

Ky grant është i treti, akorduar nga Qeveria Japoneze për sektorin e shëndetësisë. Nga ky projekt përfitojnë 14 qendra urgjence në spitalet rajonale të vendit e konkretisht në qytetet Lezhë, Kukës, Dibër, Durrës, Elbasan, Fier, Berat, Vlorë, Gjirokastër, Korçë, spitalet e qyteteve Lushnjë dhe Sarandë si dhe qendrat e urgjencës në Shërbimin e Pediatrisë në QSUT dhe Urgjencën e Tiranës. Në këto qendra do të instalohen afërsisht 47 tipa aparaturash të reja, në sasi të ndryshme, ku përfshihen autoambulanca me pajisje të avancuara për shpëtimin e jetës, sete diagnostikimi deri edhe dy skaner si dhe pajisje të tjera që nevojiten për dhënien e ndihmës në rast urgjence. Instalimi dhe vënia në funksion të plotë e pajisjeve, do të përfundoj brenda vitit.