Basketbollisti Kevin Durant ishte figura qendrore e klubit të basketbollit Oklahoma City Thunder, e cila shënoi fitore me rezultat 106:99 në ballafaqim me klubin Atlanta Hawks, në ndeshjen e vlefshme të NBA ligës. Durant shënoi më së shumti pikë, gjithsej 33, që ishin edhe çelësi i fitores. Kevin Durant dëshmoi formë të lartë, përveç që shënoi 33 pikë, ka pasur edhe 11 kërcime. Sipas statistikave, ky basketbollist është shënuesi i dytë më i mirë në ligë me 29.6 pikë, dhe nëse vazhdon këtë formë së shpejti mund të marrë edhe kreun e listës së shënuesve të NBA-së. Ndër më të dalluarit te vendasit ishin edhe basketbollisti Jeff Green me 19 pikë të shënuara dhe që dërguan skuadrën e tyre drejt fitores së 27 në kampionat dhe kanë pasuar 21 humbje. Te mysafirët paraqitje të mirë ka pasur basketbollisti Josh Smith, i cili realizoi 15 pikë, por ishin të pamjaftueshme që të kthehen me fitore. Atlanta deri më tash ka shënuar 30 fitore dhe pësuar 17 humbje në këtë kampionat. Fitore interesante dhe me shifra rekorde ka arritur edhe klubi Indiana Pacers, duke mposhtur me rezultat 130:115 skuadrën e Toronto Raptorsit. Kjo ndeshje ka qenë mjaft interesante dhe ajo që e veçon është shënimi i pikëve nga të dyja klubet, që kaluan shifrën mbi 100 pikë.

Rezultatet

Oklahoma City Th.- Atlanta Hawks 106:99

Houston Rockets - Golden State W. 119:97

Chicago Bulls - Los Angeles 82:90

Cleveland Cavaliers - Memphis G. 105:89

Indiana Pacers - Toronto Raptors 130:115

Orlando Magic - Milwaukee Bucks 99:82

New Jersey Nets - Detroit Pistons 93:97