Një burrë e një grua janë gjetur të vdekur, brenda në një makinë në Tiranë, të martën në mëngjes. Makina ku ndodhej çifti i vdekur është gjetur pranë një garazhi në parkingun në hyrje të Qendrën Spitalore Universitare “Nënë Tereza”. Kanë qenë rojet e spitalit të cilët sapo kanë parë viktimat brenda në makinë kanë njoftuar policinë.

Nga verifikimet e para policia deklaroi se viktimat mund të ishin rreth moshës 50 vjeçare. Pas veprimeve të para procedurale grupi i ekspertëve hetimorë ka mundur të bëjë identifikimin e viktimës mashkull nëpërmjet patentës. Ai është Luan Veizi, 58-vjeçar, banor pranë Uzinës Dinamo në Tiranë. Po punohet për identifikimin e gruas. Policia dyshon se vdekja e çiftit mund të ketë ndodhur nga asfiksia rreth orës 6.00 të mëngjesit të sotëm. Në trupat e viktimave nuk janë gjetur asnjë shenjë dhune. Viktimat janë dërguar në morgun e Tiranës për të bërë autopsinë, e cila do të përcaktojë saktë shkakun e vdekjes.