Një aeroplan pasagjerësh i kompanisë ajrore Ethiopian Airlines është rrëzuar në Detin Mesdhe, në afërsi të kryeqyteti të Libanit, Beirut.

Aeroplani i tipit Boeing 737 u zhduk nga radarët pak minuta pas nisjes nga aeroporti i Beriutit në drejtim të kryeqytetit të Etiopisë, Adis Abeba.

Në bordin e aeroplanit ndodheshin mbi 80 pasagjerë dhe nëntë pjesëtarë të ekipazhit.

Dëshmitarët thanë se kishin parë një shtëllungë të madhe zjarri që u përplas në det dhe me të gdhirë disa nga pjesët e aeroplanit të rrëzuar dukeshin që nga bregu.

Operacioni i shpëtimit, që po drejtohet nga flota detare libaneze, po përpiqet të zbulojë nëse ka ndonjë të mbijetuar pas rrëzimit të aeroplanit.

Ekipet e kërkimit kanë gjetur disa trupa pa jetë.

Kombet e Bashkuara, të cilat kanë një mision paqeruajtës në Liban, kanë dërguar dy anije dhe helikopterë shtesë për këtë operacion.

Ministri libanez i Transportit tha se ndër pasagjerët ishin edhe dy shtetas britanikë dhe një kanadez.

Njëra nga udhëtarët ishte edhe bashkëshortja e ambasadorit francez në Liban.

Shumica e pasagjerëve ishin shtetas libanezë dhe etiopianë.

Ende nuk dihen shkaqet e rrëzimit të aeroplanit.

Burime të aeroportit thanë se aksidenti mund të ishte shkaktuar nga moti i keq.

Në Beriut ka patur reshje të shumta dhe aeroplani u nis mes stuhisë.