Njëri prej hendbollistëve më me përvojë, Arben Muçolli, që luan me sukses në radhët e skuadrës së Besa Famiglias nga Peja, ka thënë se skuadra e tij nuk do të heq dorë në luftë për titull të kampionit. “Jemi të vetëdijshëm se qëndrojmë gjashtë pikë larg liderit të tabelës, Kastrioti i Ferizajt, por kemi ende gjasa për titull. Besa ka skuadër të shkëlqyeshme dhe që do ta ndjek titulli. Deri në javën e 19 apo 20-të mund të dihet se çfarë janë gjasat reale që ta fitojmë kampionatin. Nëse Prishtina e mposht Kastriotin, por edhe ne e mundim, atëherë Besa është kandidate për titull. Nëse ndodh e kundërta atëherë mendoj se ferizajasit pa telashe do të bëhen kampion. Nuk është e tepër të them se Kastrioti gjasa për ta fituar kampionatin i ka 80 për qind, por jo edhe Prishtina. Kastrioti është kandidat kryesor për titull, ndërsa Prishtina nuk ka kapacitet të luftojë për titull të kampionit”, tha Muçolli. Kapiteni i klubit pejan, beson se nëse për titull nuk mund të bëjnë gjë, do ta fitojnë trofeun e kupës. “Do të luftojmë deri në fund për trofeun e kupës. I kemi të gjitha mundësit dhe kushtet që të fitojmë kupën. Kemi kushtet më të mira fala sponsorit Fadil Idrizit”, tha Muçolli. Skuadra pejane tash e sa ditë ka nisur përgatitjet për stinorin pranveror nën drejtimin e trajnerit të mirënjohur, Jasmin Mërkoja. “Stërvitem një herë në ditë dhe në aspektin kondicional.

Nga java e ardhshme do të ushtrojmë dy herë në ditë dhe në të gjitha pikëpamjet”, ka thënë Muçolli. Besa Famiglia ka nisur negociatat me disa nga hendbollistët e Maqedonisë, Malit të Zi dhe Bosnjës. “Bisedime janë duke vazhduar dhe kemi përparime. Sa i përket emrave nuk mund t’i bëj të ditur për arsye se nuk ka diçka konkrete. Kur të arrijmë marrëveshjen me hendbollistët që jemi në bisedime, edhe do t’i bëjmë të ditur”, nënvizoi Muçolli. Ai në vazhdim ankohet edhe për kushtet jo të mira për stërvitje në palestrën e sportit “Karagaçi” në Pejë. “Është shumë ftohtë për të stërvitur, megjithatë po i përballojmë të ftohtit”, theksoi Muçolli. Besa Famiglia stinorin vjeshtor e ka përfunduar në vendin e tretë me 20 pikë të tubuara, ndërsa në pozitën e parë është Kastrioti me 26 pikë.