Skiatori i kombëtares së Kosovës, Albin Tahiri, arriti sukses të mirë në turneun ndërkombëtar të skive, i mbajtur në qendrën e skive “Sljeme” të Kroacisë. Ai në disiplinën e sllallomit, në një konkurrencë shumë të fortë, zuri vendin e nëntë me kohë të kaluar 1.37,39 minuta, bën të ditur Emin Dushollovci, zyrtar i Federatës së Skive të Kosovës. Fitues i këtij turneut në Kroaci doli gjermani Christian Mittrer, i cili arriti në cak me kohë të kaluar 1.33,51 minuta. Dushollovci suksesin e Tahirit e vlerësoi si shumë të lartë, duke pasur parasysh se morën pjesë shumë skiatorë nga shtetet më të forta evropiane.