Përkundër paralajmërimeve se diskutimi i përmbytjeve në rrethin e
Shkodrës në mbledhjen e jashtëzakonshme të Kuvendit shqiptar do t’i
kthente deputetët socialistë në Kuvend, kryetari i PS, Edi Rama, e
mohoi këtë gjë gjatë mbledhjes së Asamblesë së përgjithshme të partisë.
Për të edhe më tej prioritet mbetet hapja e kutive. Megjithatë, anëtari
i Kryesisë së PS, Ben Blushi bojkotin e sheh si të pakuptimtë, ndërkaq
politikën e Ramës, të mbrapsht. Ai thotë se nga muaji mars do të jetë
në Kuvend.

Të dielën, në mbledhjen e Asamblesë së Partisë Socialiste, kryetari i
kësaj partie, Edi Rama deklaroi se pas përmbytjeve në Shkodër, ekziston
edhe një arsye më shumë për largimin e qeverisë aktuale.

“Shkodrën nuk e përmbyti Zoti, por marrëzia e pushtetit”, pohoi Rama.
Duke falënderuar të gjithë deputetët e PS për qëndrimin e tyre pranë
këtyre njerëzve, Rama përkujtoi se "ne do të kërkojmë me këmbëngulje
dëmshpërblimin për çdo familje të këtyre zonave”, megjithëse nuk tregoi
se si socialistët mendojnë ta bëjnë këtë duke qëndruar jashtë
institucioneve vendore. Sipas Ramës, përmbytjet tmerruan një popull të
tërë, ndërkohë që kryeministri Berisha, në vend ta largonte ministrin
Prifti, e falënderonte atë dhe ministrat e tjerë për menaxhimin e mirë
të situatës. Duke u ndalur te mandatet e PS, Rama theksoi se “ mandatet
përmenden për të larguar vëmendjen nga situata”, edhe pse, sipas tij,
"mandatet janë të popullit opozitar dhe nuk mund të digjen”.

Kryesocialisti sqaroi gjithashtu se do të vazhdohet me protesta, sepse
"kjo është rrugë e një populli opozitar përballë këtij shteti”.

“Sot kemi një arsye madhore për rënien e kësaj qeverie. Çfarë duhet të
presim nga kjo qeveri? Pse Shqipëria të tolerojë këtë qeveri që vret
dhe shemb?”, nënvizoi mes tjerash kryetari socialist.
Për më tepër, ai akuzoi edhe kryetaren e Kuvendit, Jozefina Topalli, e
cila, sipas Ramës, po tenton të bëjë diversion brenda deputetëve të
opozitës. Rama kështu i kundërshtoi shpresat për kthimin e deputetëve
opozitarë në Kuvend, ndërkohë që ritheksoi se “hapja e kutive mbetet
lufta jonë për jetesë”.