Lëvizja “Vetëvendosje” ka prezantuar sot harta dhe të dhëna të tjera që flasin se mijëra hektarë të territorit të Kosovës janë të uzurpuara ose pretendohen nga vendet fqinje, Maqedonia, Serbia dhe Mali i Zi.

Drejtuesi i kësaj organizate, Albin Kurti, akuzoi Qeverinë e vendit se po u jep vende fqinje mijëra hektarë tokë të Kosovës, në shkëmbim të vendosjes së marrëdhënieve diplomatike.

“Përderisa në vitin e kaluar, kryeministri i Kosovës i vendoste tabelat ‘Mirësevini në Republikën e Kosovës’ në disa pika kufitare në Kosovë, por jo edhe në veri të vendit, këtë vit kanë filluar që të tjerët t’ia vendosin Kosovës tabelat, duke ia rrudhur territorin për disa kilometra. Duket qartë se për të vendosur marrëdhënie diplomatike me fqinjët, Qeveria e Kosovës iu jep atyre territore mijëra hektarëshe. Vetëm për pozita të ambasadorëve, për zyra e privilegje, po japin territor”, tha Kurti, sot në një konferencë me gazetarë

Ai po ashtu theksoi se në Kosovë po mbahen zgjedhje lokale që krijojnë kufij të rinj të komunave dhe i përforcojnë ata, ndërkohë që kufijtë e Kosovës, sipas tij, janë të pambrojtur dhe gjithandej po humbin territor. “Përveç hapësirës tokësore si të tillë, në shënjestër janë kuotat e larta malore që kanë rëndësi strategjike-ushtarake si dhe burimet e ujit”.

Kurti rikujtoi se më 9 qershor 1999, në Kumanovë, u nënshkrua Marrëveshja Tekniko-Ushtarake ndërmjet gjeneralëve të KFOR-it dhe gjeneralëve serbë të Ushtrisë Jugosllave. “Kjo marrëveshje pesëfaqëshe përkufizonte shtigjet përmes së cilave trupat jugosllave do të tërhiqeshin nga Kosova. Mirëpo, më 9 qershor 1999, gjeneralët serbë me gjasë i kanë kontrabanduar hartat e tyre si valide në këtë marrëveshje, në të cilat Kosova ka kufij të tjerë. Harta topografike e Kosovës që është aprovuar në Kumanovë, e ku s’pati të ftuar asnjë shqiptar, nuk përputhet me kufijtë e Kosovës, sipas Kushtetutës së vitit 1974. Me luftën që ende s’kishte mbaruar në njërën anë dhe me Maqedoninë e Shqipërinë përplot refugjatë në anën tjetër, duket se gjeneralët e NATO-s u ngutën dhe e pranuan hartën e Serbisë për Kosovën. Sot, anekënd Kosovës kemi probleme kufitare që rrënjët e tyre i kanë rrënjët në Kumanovën e 9 qershorit 1999”, u shpreh drejtuesi i “Vetëvendosjes”.

Sipas Kurtit, kjo është në kundërshtim edhe me Planin e Ahtisaarit. “Në nenin 3.2 të aneksit VIII të quajtur “Sektori i Sigurisë” në Planin e Ahtisaarit thuhet që ‘Territori i Kosovës do të përkufizohet nga vija kufitare e KSAK-së brenda RSFJ-së, ashtu siç kanë qenë këto vija kufitare më 31 dhjetor 1988, përveç ndryshimit të vijës kufitare nga marrëveshja e demarkacionit në mes të RFJ-së dhe IRJM-së më 23 shkurt 2001’”.